ގެދޮރު ގެއްލި ހާލުގައި ޖެހިފައިވާ ފަލަސްޠީނުގެ މަންމައެއް އެއްމާބަނޑު ހަތަރު ކުދިން ވިހައިފިއެވެ.

ފަލަސްޠީނުގެ އީމަން އަލް މަސްރީ އޭނާގެ ހަތަރު ކުދިން ވިހައިފައިވަނީ އޭނާގެ ގެއާއި އެތައް މޭލެއްގެ ދުރުގައިވާ ޣައްޒާގެ ދެކުނުގެ ސަރަހައްދުގެ ހޮސްޕިޓަލެއްގައެވެ. އީމާން އަކީ ފަލަސްތީނުގެ ޣައްޒާގެ އުތުރަށް ނިސްބަތްވާ ޒުވާން އަންހެނެކެވެ.

އޮކްޓޫބަރު މަހުގެ މެދެއްހާ ހިސާބުގައި އީމާން އޭނާގެ އަނެއް ތިން ކުދިންނާއި ފިރިމީހާ ޢައްމާރް އާއި އެކު ބައިތް ހަނޫންގައި ހުންނަ އޭނާގެ ގެ ދޫކޮށް ޣައްޒާގެ ދުކުނަށް ހިޖުރަ ކޮށްފައިވަނީ ފައިމަގުގައެއެވެ.

ފައިމަގުގައި އެ އާއިލާއިން ފަސް ކިލޯމީޓަރު ހުރަސްކޮށް މިހާރު ދިރިއުޅެމުންދަނީ ޖަބަލިއްޔާ ރެފިޔުޖީ ކޭމްޕްގައެވެ. އެދިގު ދަތުރު ކުރިއިރު އޭނާގެ ބަނޑަށް ހަމަހެވެ.

“އެއީ ވަރަށް ދިގު ދަތުުރެއް، އެދަތުރުގެ ސަބަބުން އަހަރެންގެ މާބަނޑު ހާލަތައްވެސް އަސަރު ކުރި” 28 އަހަރުގެ އީމާން އަލްކަޒީރާ އަށް ބުނެފައިވެއެވެ.

އީމާން އޭނާގެ އެއްމާބަނޑު ހަތަރު ކުދިން ވިހައިފައިވަނީ ސީ ސެކްޝަން ހަދައިގެނެވެ. އޭގެ ތެރޭގައި ހިމެނެނީ 2 އަންހެންކުދިން ކަމަށްވާ ޓިއާ އަދި ލީން އާއި 2 ފިރިހެން ކުދިން ކަމަށްވާ ޔައްސިރް އަދި މުޙައްމަދެވެ.

އީމާންގެ އެއްމާބަނޑު ހަތަރު ކުދިންގެ ތެރެއިން 3 ކުދިން. ފޮޓޯ: އަލްޖަޒީރާ

ސީ ސެކްޝަނަށްފަހު މާ ގިނަ އިރުތަކެއް ނުވަނިސް ކުދިންނާއި އެކުގައި ހޮސްޕިޓަލް ދޫކޮށް ދިޔުމަށް އީމާން އަށް އެންގިއެވެ. އެއީ ހަނގުރާމައިގައި ޒަޚަމްވާ މީހުންނަށް ފަރުވާ ދިނުމަށް ޖާގަ ހޯދުމަށެވެ.

ނަަމެވެސް ހަތަރު ކުދިންގެ ތެރެއިން ގެއަށް ގެންދަން ލިބުނީ 3 ކުދިންނެވެ. ވިހެއިރުވެސް ޙާލު ދެރަކޮށް އޮތް މުޙައްމަދު ޖެހުނީ ހޮސްޕިޓަލުގެ ނާސަރީގައި ބާއްވާށެވެ.

މިހާރު އީމާން އާއި ޢައްމާރް އަދި އޭނާގެ 6 ކުދިން ދިރިއުޅެމުންދަނީ މިހާރު ރެފިޔުޖީ ކޭމްޕެއްގެ ގޮތުގައި ބޭނުންކުރަމުންދާ ސްކޫލެއްގެ ކްލާސް ރޫމެއްގެ ތެރޭގައި އެމީހުންގެ ޢާއިލާގެ އިތުރު 50 މީހަކާއި އެކުއެވެ.

ހޮސްޕިޓަލްގެ ނާސަރީގައި ފަރުވާ ހޯދަމުންދާ މުޙައްމަދުގެ ވާހަކަ ކިޔައިދެމުން އީމާން ބުނެފައިވަނީ ވިހެއިރުވެސް މުޙައްމަދުގެ ގައިގަ ހުރީ އެންމެ ކިލޯއެއް ކަމަށެވެ. އަދި އެކުއްޖާ ސަލާމަތް ނުވިކަމަށް އީމާން ވަނީ އަލްޖަޒީރާ އަށް ބުނެފައެވެ.

ހަނގުރާމަ އަށް 11 ހަފްތާ ވެގެން ގޮސްފައިވާ އިރު އީމާންގެ އުންމީދު ވަނީ ފަނޑުވާން ފަށައިފައެވެ.

އީމާންގެ ފިރިމީހާ ޢައްމާރް އަލްޖަޒީރާ އާއި ވާހަކަ ދައްކަމުން ބުނެފައިވަނީ އޭނާގެ ޢާއިލާގެ ޒަރޫރަތް ތައް ފުއްދައި ނުދެވޭތީ އޭނާއަށް އަރައި ނުގަނެވޭނެ ހިތާމަތަކެއް ލިބިގެން ގޮސްފައިވާ ކަމަށެވެ.

“އުންމީދެއް ނެތް ކަމުގެ އިޙްސާސް މިހާރު ކުރެވެނީ، އަހަރެންގެ ކުދިންނަށް ޓަކައި އަހަރެން ބިރުގަނޭ، އެކުދިން ރައްކާކުރާނެ ގޮތެއް އަހަންނަކަށް ނޭނގެ، މުޅިދުވަސް މިހާރު މިހޭދަކުރަނީ ބޭރުގަ، ކާއެއްޗެއް ހޯދުމުގަ” ޢައްމާރް ބުނެފައިވެއެވެ.

ޢައްމާރް އިތުރަށް ބުނެފައިވަނީ އޭނާގެ ދަރިފުޅު ޓިއާ ދުނިޔެއަށް އުފަން އޮތީ ރީނދޫ ވެފައިކަމަށެވެ. އެހެންކަމުން އެކުއްޖާއަށް މަންމަގެ ގާތުން ދޭ ކިރު ވަރަށް ބޮޑަށް ބޭނުންވެފައިވާ ކަމަށެވެ.

އެކަމަށްޓައި އެކުދިންގެ މަންމައަށް ފައިދާހުރި ކާނާ ބޭނުންވާ ކަމަށާއި ކުދިންނަށް ކިރާއި ނެޕީ އިންތިހާއަށް ބޭނުން ވެފައިވާއިރު އޭގެން އެއްވެސް އެއްޗެއް ހޯދައިދެވެން ނެތް ކަމަށެވެ.