ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހަޅުއްވާފައިވާ މިފްކޯ ހިންގުމުގައި މަސްވެރިންގެ ދައުރު ފުޅާކުރުމުގެ ސިޔާސަތުގެ ދަށުން، މިފްކޯ ބޯޑުގައި ބައިވެރިވާން ޝައުގުވެރިވާ މަސްވެރިންނަށް ފުރުސަތު ހުޅުވާލައިފިއެވެ.

މިކަން އިއުލާން ކޮށް މިފްކޯއިން ބުނީ ސަރުކާރުގެ ފުރަތަމަ "ހަފްތާ 14"ގެ މަގު ޗާޓުގައި ހިމަނާފައިވާ، މިފްކޯ ހިންގުމުގައި މަސްވެރިންގެ ދައުރު ފުޅާކުރުމުގެ މަސައްކަތްތަކުގެ ތެރެއިން، މިފްކޯގެ ބޯޑުގައި މަސްވެރިން ތަމްސީލުކުރާނެ ފަރާތެއް ޢައްޔަނު ކުރުމަށްޓަކައި ބޯޑު މެންބަރުކަމުގެ މަގާމަށް ކުރިމަތިލުމުގެ ފުރުޞަތު މިއަދުން ފެށިގެން ހުޅުވާލާފައިވާ ކަމަށެވެ.

މި އިއުލާންގައި މިފްކޯއިން ވަނީ މި މަގާމަށް ކުރިމަތިލާ ފަރާތްތަކުންގެ ކިބައިގައި ހުންނަން ޖެހޭ ޝަރުތުތައްވެސް އާންމު ކޮށްފައެވެ.

Advertisement

އޭގެ ތެރޭގައި ހިމެނެނީ  ދިވެހި ރައްޔިތަކު ކަމުގައިވުމާއި، މަސްވެރިކަމުގައި މިހާރުވެސް ޙަރަކާތްތެރިވާ ފަރާތަކަށްވުމުގެ އިތުރުން އުމުރުން 18 އަހަރު ވެފައިވުމާއި، ޖިނާއީ ކުށެއް ކުރިކަން ސާބިތުވެ، 12 މަސްދުވަހަށް ވުރެ ދިގު މުއްދަތެއްގެ ޙުކުމެއް ތަންފީޛުކުރަމުންދާ މީހަކު ކަމުގައި ނުވުން ހިމެނެ އެވެ. އަދި އަދި ޖިނާއީ ކުށެއް ކުރިކަން ސާބިތުވެ، 12 މަސްދުވަހަށް ވުރެ ދިގު މުއްދަތެއްގެ ޙުކުމެއް ކޮށްފައިވާ މީހަކުނަމަ އެ ޙުކުމެއް ތަންފީޛުކޮށް ނިމުނުތާ، ނުވަތަ އެ ޙުކުމުން ކަނޑައެޅުނު އަދަބު މަޢާފްކުރެވުނުތާ ފަސް އަހަރު ވެފައިވާ މީހަކު ކަމުގައިވުން ވެސް ހިމެނެ އެވެ.

އެހެންކަމުން މިފްކޯ ބޯޑުގައި މަސްވެރިން ތަމްސީލް ކުރުމަށް ކުރިމަތިލުމަށް އެދޭ ފަރާތްތަކުން އެކަމަށް އެދޭ ފޯމާއި، ކައުންސިލްގެ ލިޔުމާ އަދި އައިޑީ ކާޑުގެ ކޮޕީ 2024 ވަނަ އަހަރުގެ ޖެނުއަރީ މަހުގެ 11 ވަނަ ދުވަހު މެންދުރު 13:30 ގެ ކުރިން މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އަށް ހުށައެޅުމަށް ވަނީ މިފްކޯއިން ވަނީ އެދިފައެވެ.