ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެމްބަރުންގެ އަދަދު 40،000 ވުރެ މައްޗަށް އަރައިފިކަމަށް ޕީއެންސީގެ ޗެއާ ޕާސަން އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަބްދުއްރަހީމް މިފަދައިން ވިދާޅުވީ މިރޭ ދަރުބާރުގޭގައި ކުރިއަށް ދާ ޕީޕީއެމް/ޕީއެންސީ ގެ "ދިވެހީންގެ ރާއްޖެ ފެށުން" ޖަލްސާގައި ވާހަކަފުޅު ދައްކަވަމުންނެވެ.
މިގޮތުން އަބްދުއްރަހީމް ވިދާޅުވީ ރިޔާސީ އިންތިހާބުގައި ވާދަކޮށް ފުރަތަމަ ބުރު ނިންމާ، ދެވަނަ ބުރަށް ޕީޕީއެމް، ޕީއެންސީ އަދި އެމްއެންޕީ ނުކުމެ އިންތިހާބު ކާމިޔާބު ކުރިއިރު ޕީއެންސީގައި ތިބި މެމްބަރުންގެ އަދަދަކީ 3،022 ކަމަށެވެ. ނަމަވެސް އިންތިހާބަށް ފަހު މިހާހިސާބަށް އެ ޕާޓީގައި ތިބި މެމްބަރުންގެ އަދަދު 40،000އިން މައްޗަށް އަރާފައިވާކަމަށް ޢަބްދުއްރަޙީމް ވިދާޅުވިއެވެ.
"އާދެ އަޅުގަނޑުމެން ދެ ޕާޓި މިއަހަރު ބޭއްވުނު ރިޔާސީ އިންތިހާބުގައި ވާދަކޮށް ފުރަތަމަ ބުރު ނިންމާ ދެވަނަ ބުރަށް އަޅުގަނޑުމެން ތިން ޕާޓީ، ޕީޕީއެމް، ޕީއެންސީ އަދި އެމްއެންޕީ ނުކުމެ އިންތިހާބު ކާމިޔާބު ކުރިއިރު ޕީއެންސީގައި ތިބި މެމްބަރުންގެ އަދަދަކީ 3،022. މިރޭ މިތާގައި އަޅުގަނޑުމެން ޖަލްސާ ކުރަން އައިސް މިތިބިއިރު މިއަދު މިހާ ހިސާބަށް ޕީއެންސީގައި ދަފްތަރުގައި 40 އެތައް ހާސް މެމްބަރުންނެއް ވަނީ ރަޖިސްޓްރީ ކުރެވިފަ."
އަބްދުއްރަހީމް ވިދާޅުވިއެވެ.
މިކަމުން މި ދައްކާދެނީ ރިޔާސީ އިންތިޚާބުގައި ރައްޔިތުން ނިންމި ނިންމުން ރައްޔިތުން ބަލައިގަނެ ކުރިއަށްދާން ތައްޔާރަށް ތިބިކަން ކަމަށާއި ދިވެހީންގެ ރާއްޖެ ބިނާކުރަން ދިވެހީން ތިބީ ތައްޔާރަށްކަން މިކަމުން ދައްކުވައިދޭކަމަށް އަބްދުއްރަހީމް ވިދާޅުވިއެވެ.
މިރޭގެ މި ޖަލްސާގައި ރައްޔިތުންގެ މަޖިލިސް އެމްޑީޕީގެ 13 މެމްބަރުން ވަނީ ޕީއެންސީއާއި ގުޅި، ފޯމް ވަނީ ހަވާލުކުރައްވާފައެވެ.
Advertisement
This content is created and paid for by advertisers and does not involve Voice Journalists
