މިހާރު ކޮންމެހެން ވަޒީރުންގެ މަޖިލީހަށް ރައްޔިތުންގެ މަޖިލީހުން ރުހުންދޭތޯ ނޫޅުއްވާކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޗެއާ ޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
"ދިވެހީންގެ ރާއްޖެ ފެށުން" ނަމުގައި ދަރުބާރުގޭގައި މިރޭ ކުރިއަށްދިޔަ ޖަލްސާގައި ވާހަކަފުޅު ދައްކަވަމުން ޕީއެންސީގެ އަބްދުއްރަހީމް ވިދާޅުވީ ރުހުން ނުދީގެން އެކަމާއި ކަންބޮޑު ނުވާކަމަށާއި އަމާޒަކީ ރައްޔިތުންނާއި އެކުގައި ކުރިއަށް ދިޔުން ކަމަށެވެ.
"އަޅުގަނޑު މިރޭ ދަންނަވާލަން ބޭނުމީ އަޅުގަނޑުމެން މިހާރު ތިޔަ ރުހުން ހޯދާކަށް ނުވެސް އުޅެމު. ރުހުން ދެންޏާ ދޭންވީ. ނުދެންޏާ ނުދެއްވާ ތިއްބަވަންވީ. "
އަބްދުއްރަހީމް ވިދާޅުވިއެވެ.
އެބޭފުޅާ ވިދާޅުވީ ރުހުން ނުދީފި ނަމަ އިތުބާރު ނެތް ކަމުގެ މައްސަލައެއް ހުށައަޅައިގެން ވަޒީރަކު މަގާމުން ބޭރު ނުކުރެވޭނެ ކަމަށާއި، ރައީސުލްޖުމްހޫރިއްޔާ އަށް ލިބިފައިވާ ބާރުގެ ދަށުން އެ މަގާމަކަށް އައްޔަނު ކޮށްފައި ތިއްބެވި ކޮންމެ ބޭފުޅަކަށް ވެސް ގައުމަށް ހިދުމަތް ކުރުމުގެ ފުރުސަތު އޮންނާނެ ކަމަށެވެ.
އަބްދުއްރަހީމް ވިދާޅުވީ ފެހި ގާނޫނު އަސާސީގެ ޑިމޮކްރަސީ ވެރިކަން ފެށުނީއްސުރެ 2008، 2013 އަދި 2018 ވަނަ އަހަރުވެސް އިންތިހާބު ނިމި ރައްޔިތުން ހޮވާ ރައީސަކު އެމަނިކުފާނުގެ ކެބިނެޓް އެކުލަވާލައި ރުހުން ހޯދުމަށް މަޖިލީހަށް ފޮނުވި ނަމަވެސް މިއަދު މި އޮތް އެމްޑީޕީއަށް އެކަން ހަޖަމް ނުވެ ބަލައިނުގަތް ކަމަށެވެ.
މީގެ އިތުރުންވެސް އަބްދުއްރަހީމް ވިދާޅުވީ ޑިމޮކްރަސީ ދިވެހި ރާއްޖެއަށް ތައާރަފް ކުރީ ތިމަންނަމެންނޭ ބުނެ ވަކާލާތު ކުރަމުން އަންނަ މީހުން ދައްކައި ދިނީ އެއީ ޑިމޮކްރަސީ ދަންނަ ބައެއް ނޫން ކަމަށެވެ. އަދި ފެހި ގާނޫނު އަސާސީ ގެ ދަށުން އުފެދިގެން އައި ކޮންމެ ސަރުކާރެއް އުފެދިގެން އައިސް ރައީސުލްޖުމްހޫރިއްޔާ އަކު ރައްޔިތުން އިންތިހާބު ކުރުމުން ރައީސުލްޖުމްހޫރިއްޔާ އެމަނިކުފާނުގެ ކެބިނެޓް އެކުލަވާލައި ރުހުން ހޯދަން މަޖިލީހަށް ފޮނުވުމުން ރުހުން ނުދޭ ބަޔަކު އެއީ ޑިމޮކްރަސީ ދަންނަ ބައެކޭ ބުނެ ވަކާލާތު ކުރުމުގެ ފުރުސަތެއް ނެތް ކަމަށެވެ.
"އަޅުގަނޑު ދަންނަވާލަން ބޭނުންވަނީ ޑިމޮކްރަސީ ދަސްކުރާ ކަމަށް ވަންޏާ ޕީޕީއެމް/ ޕީއެންސީ ހިނގާ މަގުން ހިނގާށޭ. ދިވެހި ރާއްޖޭގައި ފުރިހަމަ ޑިމޮކްރަސީ އުސޫލުން ވެރިކަން ކުރަމުން އަންނަ ޕާޓީ އަކީ ޕީޕީއެމާއި ޕީއެންސީ. އަޅުގަނޑުމެން މިދަނީ މިކަން އަޅުގަނޑުމެންގެ ކޮންމެ އިންތިހާބެއްގައި ދައްކާދެމުން. އަޅުގަނޑުމެންނާ ކުރިމަތިވާ ކޮންމެ ގޮންޖެހުމަކާއި ކުރިމަތި ލަމުން މިދަނީ ޑިމޮކްރަސީގެ ރިވެތި އުސޫލުން."
އަބްދުއްރަހީމް ވިދާޅުވިއެވެ.
ރައީސް ޑރ.މުއިއްޒުގެ ކެބިނެޓަށް އެމްޑީޕީގެ ބޮޑު އަޣުލަބިއްޔަތެއް އޮންނަ ރައްޔިތުންގެ މަޖިލީހުން ރުހުން ނުދޭތީ ގިނަ ފަރާތްތަކަކުން އަންނަނީ ނުރުހުން ފާޅު ކުރަމުންނެވެ.
19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާވެސް ރުހުން ދިނުން ނުހިމަނާ އެޖެންޑާ ކޮށްފައިވާއިރު، ރައްޔިތުންގެ މަޖިލީހުގެ މެންބަރުން އެދިލައްވާނަމަ، ދައުރުން ބޭރުގައި ޖަލްސާއެއް ބާއްވަވައިގެން ނަމަވެސް، ވަޒީރުންނަށް ރުހުން ދިނުމުގެ މައްސަލަ ކުރިއަށް ގެންދަވާނެ ކަމަށް މަޖިލީހުގެ ރައީސް މުހައްމަދު އަސްލަމް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
