ވޯޓަށް ދެތިން މަހަށް ވީމަ ޖައްރާފާ އެއް ހިފައިގެން ގޮސް ހިއްކާ މީހަކަށް ވާކަށް ބޭނުންފުޅު ނުވާކަމަށް ރައީސުލްޖުމްހޫރިއްޔާ ޑރ.މުޙަައްމަދު މުއިއްޒު ވިދާޅުވެއްޖެއެވެ.
"ދިވެހީންގެ ރާއްޖެ ފެށުން" ނަމުގައި ދަރުބާރުގޭގައި މިރޭ ކުރިއަށް ދިޔަ ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރައްޔިތުނަށް އެންމެ މުހިންމީ ގެދޮރުވެރިކަން ކަމަށާއި އެކަން ހައްލު ކުރުމަށްޓަކައި ވޯޓަށް ދެތިން މަހަށް ވީމަ ޖައްރާފާއެއް ހިފައިން ގޮސް ހިއްކާ މީހަކަށް ވާން ބޭނުންފުޅު ނުވާކަމަށާއި ބޭނުންފުޅު ވަނީ އެންމެ ފުރަތަމަ ދުވަހު އެކަން ކުރަން ކަމަށެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ ރައްޔިތުނަށް އިޚުލާސްތެރި ވުމަކީ އަމަލާއި ބަހުން އިޚުލާސްތެރިވުން ކަމަށާއި ކެމްޕޭންގައި ގައުމީ މައްސަލަތައް ނަގާފަ ދިވެހި ގައުމުގައި އެންމެ ބޮޑީ ގެދޮރުގެ މައްސަލަ ކަމަށް ތަކުރާރުކޮށް ދެންނެވި ކަމަށެވެ. އެހެންކަމުން އެންމެ ބޮޑު މައްސަލަ ކަމުގައިވާ ބޭރު ސިފައިން ގެންދިޔުމުގެ މަސައްކަތް ވެސް ފަށާފައިވާކަމަށާއި ދެން އެންމެ ބޮޑު މައްސަލަ ކަމުގައިވާ ގެދޮރުގެ މައްސަލައިގައި އެއްމަސް ވެސް ހަމަ ނުވަނީސް ބިން އެއޮތީ ހިއްކަން ފަށާފައި ކަމަށް އެމަނިކުފާނު ވިދާޅުވިއެވެ.
" ރައްޔިތުނަށް ޓަކައި ތިމާމެންނަށް މާބޮޑު ކަމެއް އިޚްލާސްތެރި ކަމާއި އެކު ނުކޮށްދެވުނީމާ، ރައްޔިތުން ގޮތެއް ނިންމީމާ، ދެން ކަންކަން އޮޅުވާލަން އުޅުމަކީ ވަރަށް ދެރަ ކަމެއް. އޮޅުވާލާއިރު ވެސް ޒައްރެއްގެ މިންވަރުވެސް ތެދެއް ނެތް. ދޮގު ހަދައިގެން، ދޮގުގެ މައްޗަށް ދޮގު. އެއަށް ކިޔަނީ ބުހުތާނު ދޮގު ކަންނޭގެ. ދޮގު ހެދުމަކީ ކޮން ގޮތަކުން ރައްޔިތުން ބަލައިގަންނާނެ ކަމެއް ބާވައޭ އަޅުގަނޑު ހިތަށް އަރަނީ. "
ރައީސް ޑރ.މުއިއްޒު ވިދާޅުވިއެވެ.
އެމަނިކުފާނު ވިދާޅުވީ ކެމްޕޭން ލޯންޗު ކުރި ދުވަހުން ފަށައިގެން މިހާތަނަށް ދެއްކި ވާކަތަކުގައި ވިދާޅުވި ފަދައިން ރާއްޖޭގެ އުތުރާއި ދެކުނުގައި ގެދޮރުވެރިކަމާއި، ހުރިހާ ކަމެއް ފުދޭ ފެންވަރަށް އެސަހައްދުގައި ޑިވެލޮޕްމެންޓް ޒޯންއެއް ތަރައްގީ ކުރުމަށް ނިންމަވާފައި ވާކަމަށެވެ. އަދި މީގެ އިތުރުން ކަނޑައެޅޭ ވަކި 7 ރަށެއް ތަރައްގީ ކުރެވިފައިވާ މަތީ ފަންތީގެ އާބަން ސެންޓާރ ތަކަށް ހައްދަވާނެ ކަމަށް ވިދާޅުވިއެވެ.
ޕްލޭނާއި އެއްގޮތަށް ހުރިހާ ސަރަހައްދެއް، އެއްވެސް ރައްޔިތެއް ،އެއްވެސް ރަށެއް ތަފާތު ނުކޮށް ތަރައްގީ ކުރައްވާނެ ކަމަށާއި މާލެ ސަރަހައްދު އެކަނި ތަރައްގީކޮށް، މި ސަރުކާރުން އުޅެނީ ހުރިހާ އެންމެން މާލެ ސަރަހައްދަށް ތޮއްޖަންސަންށޭ ބުނެ ދައްކަމުން ދަނީ އެއްވެސް ވަރެއްގެ ތެދެއް ނެތް ވާހަކައެއް ކަމަށް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
