ފަލަސްތީނުގައި ކޮންމެ ދުވަހަކު މުސްލިމުން ގަތުލު ކުރަމުންދާއިރު، އާ އަހަރު ފާހަގަކޮށް، އުފާ ފާޅުކުރުމަކީ ލަދުވެތި ކަމެއް ކަމަށް ދާރިސް ޓީވީގެ ސްޓޭޝަން މެނޭޖަރު ޢަލީ ރަމީޒު ވިދާޅުވެއްޖެ އެވެ.
އެހެން އަހަރުތައް ފަދައިން މި އަހަރުވެސް އައު އަހަރު ފާހަގަކުރުމަށް "ދިވެހިންގެ ރާއްޖެ ފެސްޓިވަލް" ނަމުގައި ބޮޑު ފެސްޓިވަލެއް ބާއްވައި، މިޔުޒިކު ޝޯވް ބާއްވައި، ހަވާ އަރުވައި އެކި ހަރަކާތްތައް ބޭއްވުމަށް ސަރުކާރުން ނިންމުމާއި ގުޅިގެން އެކަމާއި ނުރުހުން ފާޅުކުރައްވައި އެކްސްގައި ޢަލީ ކުރެއްވި ޕޯސްޓެއްގައި ވިދާޅުވީ، މި ދަނޑިވަޅަކީ ފަލަސްތީނުގައި ކޮންމެ ދުވަހަކު މުސްލިމުންގެ އެތައް ބަޔަކު ގަތުލު ކުރެވެމުންދާ ހިތާމަވެރި ވަގުތެއް ކަމަށެވެ.
އަދި މިފަދަ ހިތާމަވެރި ވަގުތެއްގައި އާ އަހަރު ފާހަގަކުރުމުގެ ނަމުގައި މިޔުޒިކް ޝޯވް ބާއްވައި ނާޗަރަންގީ ކުޅެ، އުފާ ފާޅުކުރުމަކީ ވަރަށް ދެރަ އަދި ލަދުވެތި ކަމެއް ކަމަށް ޢަލީ ވިދާޅުވި އެވެ.
މިއާއެކު ޢަލީ ވަނީ، އެކަންކަން ހުއްޓާލުމަށް ގޮވާލާފައެވެ.
ޢަލީ ރަމީޒުގެ އިތުރުން، ދީނީ ގިނަ ޢިލްމުވެރިންތަކެއް އަންނަނީ އައު އަހަރު ފާހަގަކުރަން މިޔުޒިކް ޝޯވް ބާއްވާތީ ނުރުހުން ފާޅުކުރައްވަމުންނެވެ.
ޚާއްސަކޮށް ފަލސްތީނުގައި ޔާހޫދީން ހިންގަމުންދާ ގަތުލު އާއްމުތަކަށް ދެ މަސް ދުވަހަށްވުރެ ގިނަ ދުވަސްވެ، ޝަހީދުވި މީހުންގެ އަދަދު 21،000 އަށް އަރާފައި ވާއިރު، މިއީ އުފާފާޅުކުރުން މުނާސަބު ދަނޑިވަޅެއް ނޫން ކަމަށް ޢިލްމުވެރިން އަންނަނީ ބުނަމުންނެވެ.
މީގެކުރިންވެސް ސަރުކާރުން އައު އަހަރާއި ދިމާކޮށް، މިފަދައިން މިޔުޒިކު ފެސްޓިވަލްތައް ބާއްވާތީ ޢިލްމުވެރިން ވަނީ، އިސްލާމްދީނުގައި މިޔުޒިކާއި ގުޅިގެން އައިސްފައިވާ ހުކުމް ހާމަ ކުރައްވައިދީ އެކަން ކަމުން ދުރުހެލި ވުމަށް ނަސޭހަތްތެރިވެފައެވެ.
Advertisement
This content is created and paid for by advertisers and does not involve Voice Journalists
