އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި، ދަ ޑިމޮކްރެޓްސް ގެ ޓިކެޓްގައި ހުޅުމާލޭ އުތުރު ދާއިރާއަށް ވާދަކުރައްވަން އެ ޕާޓީގެ އަންހެން ލީޑަރ ހަމްދާ މުހައްމަދު ނިންމަވައިފިއެވެ. 

މިކަން ހަމްދާ ވަނީ މީސްމީޑިއާ މެދުވެރި ކުރައްވައި އިއުލާން ކުރައްވާފައެވެ. 

ހަމްދާ އަކީ ޑިމޮކްރެޓްސް ގެ އަރަމުން އަންނަ އައު ބޭފުޅުންގެ ތެރެއިން ފާހަގަކޮށްލެވޭ ފަރާތެކެވެ. އެގޮތުން، އެ ޕާޓީގެ އެތެރޭގެ އިންތިޚާބުގައި، ހަމްދާއަށް ޕާޓީގެ އަންހެން ލީޑަރގެ މަގާމު ލިބިލެއްވީ ވަރަށް ތަނަވަސް އަގުލަބިއްޔަތަކުންނެވެ. 

Advertisement

އެ ޕާޓީގެ އަންހެން ލީޑަރ ގެ މަގާމަށް ހަމްދާ އިންތިޚާބުވެލައްވާފައި ވަނީ، %74.54 ވޯޓާއެކެއެވެ. އިންތިޚާބުގައި ހަމްދާއާއި ވާދަކުރެއްވި ޝިޔާމާއަށް ލިބިލެއްވީ %25.46 އެވެ. 

ހަމްދާ މަތީ ތަޢުލީމް ހާސިލްކުރައްވަމުންދަނީ ޕޮލިޓިކަލް ސައިންސްގެ ދާއިރާއިންނެވެ. 

ކުރިއަށް އޮތް މަޖިލީސް އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ. އެއީ މިހާރު ހިނގަމުންދާ މަޖިލީހުގައި ހިމެނޭ 87 ދާއިރާއަށްވުރެ ހަ ދާއިރާގެ އިތުރަށެވެ.