ފަނޑިޔާރުންނަށް ރައްކާތެރިކަން ފޯރުކޮށްދިނުމުގެ އިންތިޒާމްތައް ކުރެވިފައިވޭތޯ ކަށަވަރުކުރުމަށް ފަނޑިޔާރުންގެ ޖަމިއްޔާއިން ގޮވައިލައިފިއެވެ.
ފަނޑިޔާރުންގެ ޖަމިއްޔާއިން މިކަމަށް ގޮވައިލައިފައިވަނީ ރ.އަތޮޅު އިނގުރައިދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލްއުސްތާޒް މުޙައްމަދު ރަޝާދުގެ ސައިކަލުގައި ރޭ ދަންވަރު ރޯ ކޮށްލުމާއި ގުޅިގެނެވެ.
ސައިކަލުގައި ރޯކޮށްލި އަލިފާންގަނޑުގެ ސަބަބުން އެސައިކަލު ވަނީ ބޭނުން ނުކުރެވޭ ވަރަަށް ހަލާކުވެފައި ކަމަށް ފަނޑިޔާރުންގެ ޖަމިއްޔާއިން ނެރެފައިވާ ނޫސްބަޔާނުގައި ބުނެފައިވެއެވެ.
އެބަޔާނުގައި ބުނެފައިވަނީ ދިވެހިރާއްޖޭގެ ޤާނޫނު އަސާސީގައިވެސް ފަނޑިޔާރުންގެ މަސައްކަތާއި ބެހި ނުފޫޒު ފޯރުވައި ހަދައިގެން ނުވާނެ ކަމަށް ބުނެފައިވާ ކަަމަށެވެ.
ވުމާއިއެކު ޤާނޫނު ތަކުގައި ކަނޑައެޅި ބަޔާންކުރެވިފައިވާ ގޮތުގެ މަތިން، ފަނޑިޔާރުންނާއި ސަލާމަތާއި ރައްކާތެރިކަން ފޯރުކޮށްދިނުމުގެ ގޮތުން އިންތިޒާމް ކުރަން ޖެހޭ އެންމެހައި ކަންކަން އެގޮތުގެ މަތިން އިންތިޒާމް ކުރެވިފައިވާކަން ކަމާބެހެ ފަރާތްތަކުން ކަށަވަރުކޮށް ދިނުމަށް އެޖަމިއްޔާއިން ގޮވައިލައިފައިވެއެވެ.
އަދި އެކަންކަމާއި ގުޅޭ ގޮތުން އަޅަން ޖެހޭ އެންމެހާ ފިޔަވަޅުތައް އަޅައި ދިނުމަށްވެސް މި ފުރުސަތުގައި ކަމާއިބެހޭ އެންމެހާ ފަރާތްތަކަށް ދިވެހި ފަނޑިޔާރުންގެ ޖަމިއްޔާއިން އިލްތިމާސް ކޮށްފައިވެއެވެ.
Advertisement
This content is created and paid for by advertisers and does not involve Voice Journalists
