ނިމިދިޔަ އިބުރާޙިމް މުޙައްމަދު ޞާލިޙްގެ ސަރުކާރުން ނިމެން ގާތްވެފައިވަނިކޮށް މާލޭގެ ރައްޔިތުންނަށް ބޯހިޔަވަހިކަން ފޯރުކޮށްދިނުމަށް ކަމަށްބުނެ ހިއްކަން ފަށައި މަޑުޖެހިފައިވާ ހުޅުމާލެ ފޭސް 3 ގެ ބިންހިއްކުމުގެ މަސައްކަތް އަނެއްކާވެސް ފަށައިފިއެވެ.

މި މަސައްކަތް މިހާރުކުރެވެމުން ދަނީ އާބަންކޯގެ ބެލުމުގެ ދަށުންނެވެ. އެ ކުންފިނީގެ ފަރާތުން މި މަސައްކަތް ހަވާލު ކޮށްފައި ވަނީ ފުށިދިއްގަރުގެ މަސައްކަތް ވެސް ކުރަން ހަވާލުކޮށްފައިވާ ކެޕިޓަލް މެރީން އެންޑް ސިވިލް ކޮންސްޓްރަކްޝަން ކޮމްޕެނީ ލިމިޓަޑް (ސީއެމްސީ) ކުންފުންޏާއެވެ. ބިން ހިއްކުމުގެ ޢަމަލީ މަސައްކަތް ކުރިއަށް ގެންދަނީ ބޮސްކާލިސް ކުންފުނިންނެވެ.

މި މަސައްކަތް މިއަދު ފަށާފައި ވާއިރު މިކަމާއި ގުޅިގެން އާބަންކޯގެ މޭނޭޖިންގ ޑިރެކްޓަރ ފަޒުލް ރަޝީދު އެކްސް ޕޯސްޓެއް މެދުވެރިކުރައްވާ މި މަޝްރޫޢު ފެށުނުކަން ވަނީ ހާމަ ކުރައްވާފައެވެ.  

Advertisement

މި ޕޯސްޓުގައި ފަޒުލް އިތުރަށް ވިދާޅުވެފައިވަނީ ހުޅުމާލެއިން ގޯތި ލިބުނު ފަރާތްތަކަށް، ރައީސް ޑރ. މުހައްމަދު މުއިއްޒު ވިދާޅުވި ފަދައިން ގޯތި ލިބިގެން ދާނެ ކަމަށެވެ. "ވެލިފުކެއްގެ މިންވަރުވެސް އުނި ނުކޮށް، އިތުރަށް ފުރިހަމަ ކޮށްދެވޭނެ،". ޔަޤީންކަމާއިއެކު ފަޒުލް ވިދާޅު ވެފައިވެއެވެ.

ހުލުމާލެ ފޭސް 3 ހިއްކުމުގެ މި މަޝްރޫޢުއަކީ މާލެ ސަރަހައްދަށް މިހާރު ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ކުރިއަށް ގެންދެވޭ ބޮޑު މަޝްރޫއެކެވެ.

މި މަޝްރޫއުގެ ދަށުން ހުޅުމާލެ ފޭސް 3 ގެ ގޮތުގައި  63 ހެކްޓަރުގެ ބިން ހިއްކިގެން ދާނެއެވެ.