ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާން އިންތިޚާބުގައި ވާދަ ކުރުމަށް އިލެކްޝަން ބޯޑަށް ހުށައެޅި ކެންޑިޑެސީގެ ބަލައިނުގަތުމަށް ނިންމައިފިއެވެ.

ޕާކިސްތާނުގެ އިންތިޚާބު ބޭއްވުމަށް ހަމަޖެހިފައިވަނީ މިފެށޭ 2024 ވަނަ އަހަރުގެ ފެބްރުއަރީ މަހުގައެެވެ.

ޢުމުރުން 71 އަހަރުގެ ޢިމްރާން ޚާން މިވަގުތު ހުންނެވީ ޖަލު ބަންދުގައެވެ. އަދި ޕާކިސްތާނުގެ އިލެކްޝަން ބޯޑުން ވަނީ ފަސް އަހަރު ދުވަހަށް ޢިމްރާން ޚާންގެ ކެންޑިޑެސީ ހައްޤު ހިފަހައްޓައިފައެވެ. މިކަން މިގޮތައް އޮތް ނަމަވެސް ޢިމްރަން ޚާންގެ ތަހްރީކޭ އެ އިންސާފް ޕާޓީގެ ޓިކެޓްގައި އިންތިޚާބު ވާދަކުރުމަށް ވަނީ ހުށައަޅައިފައެވެ.

Advertisement

އިމްރާން ޚާން ޖަލު ޙުކުމް ތަންފީޒު ކުރަމުންދަނީ އެޤައުމެގެ މިހާރުގެ ސަރުކާރުން ޢިމްރާންގެ އިސްތަށިފުޅުގައި އަޅުވައިފައިވާ ޚިޔާނާތާއި ރިޝްވަތުގެ މައްސަލައެއް ގައެވެ.

ނަމަވެސް ޢިމްރާން ޚާން ވަނީ އެ ތުހުމަތުތަކަށް އިންކާރު ކުރައްވައި އެ ކަންކަން ދޮގުކުރައްވައިފައެވެ.

އިމްރާން ޚާންގެ ކެންޑިޑެސީ އިލެކްޝަން ބޯޑުން ޤަބޫލު ނުކޮށް އަނބުރައި ފޮނުވައިލައިފައިވާއިރު އިމްރާން ޚާނާއި އެންމެ އިދިކޮޅުކަން ބޮޑު ނަވާޒް ޝަރީފްގެ ކެންޑިޑެސީ ވަނީ ޤަބޫލު ކޮށްފައެވެ.

ޢިމްރާން ޚާން ބޮޑުވަޒީރު ކަމުގައި ހުންނަވަނިކޮށް ބޮޑު ވަޒީރުކަމުން ދުރުކޮށްފައިވަނީ ޕާކިސްތާނުގެ ޤާނޫނު ހަދާ މަޖިލީހުން އޭނާގެ އިތުބާރުނެތް ކަމުގެ ވޯޓު ނަގައިގެން 2022 ވަނަ އަހަރުގެ އޭޕްރީލް މަހުއެވެ.