ކެނެބޮސް ޓްރެފިކް ކުރިކަން ސާބިތުވެ އެއް ލައްކަ ރުފިޔާއިން މީހަކު ޖޫރިމަނާކޮށް، އުުމުރަށް ޖަލަށް ލުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައިގައި ޕްރޮސެކިއުޓާ ޖެނެރަލް (ޕީޖީ) އޮފީހުން ދައުވާ އުފުލާފައި ވަނީ ލ.ގަން ތުނޑި، އަމްސާޕެލަސް ސައިފުالله ސައީދުގެ މައްޗަށެވެ.

ޕީޖީ އޮފީހުން ހުށައެޅި މައްސަލައިގައި ބުނެފައިވަނީ 20 މެއި 2017 ވަނަ ދުވަހު މ.ފެވަރިޓް ކޯނާ/ މާލެ މުޙައްމަދު ރާއިފް ޚާލިދު ރާއްޖެއަށް މަސްތުވާ ތަކެތި އެތެރެކުރި މައްސަލައަކާއި ގުޅިގެން ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި މަސްތުވާ ތަކެއްޗާ ހަވާލުވާން ދާ ފަރާތެެއް ހޯދުމަށް އެ ގެ ކައިރީ ހަރަކާތްތެރި ވަމުން ދަނިކޮށް މުޙައްމަދު ރާއިފް ޚާލިދު ގެ އަތުން ޕާރުސަލެއް ހިފައިގެން ސައިފުالله ދާން އުޅުނު ވަގުތު ފުލުހުންގެ ބެލުމުގެ ދަށަށް ގެންގޮސް ބަލާ ފާސްކުރި އިރު ސައިފުالله ލައިގެން ހުރި ސޯޓުގެ ޖީބުން ފެނުނު ފިލްމު ހުސްކުރި ދަޅުން 19 ގްރާމް ކެނަބިސް ފެނިފައިވާކަމަށެވެ.

އެހެންކަމުން ޕީޖީ އޮފީހުން މި މައްސަލައިގައި ސައިފުالله ގެ މައްޗަށް ކެނަބިސް ޓްރެފިކް ކުރުމުގެ ދައުވާ ވަނީ އުފުލާފައެވެ.

އެހެންނަމަވެސް މި ދައުވާއަށް ސައިފުالله ވަނީ އިންކާރު ކޮށްފައެވެ. އޭނާ ބުނީ ކެނަބިސް ހުރި ދަޅު ފެނުނު ސޯޓަކީ އޭނާގެ ރައްޓެއްސެއްގެ ސޯޓު ކަމަށާއި އެ ސޯޓުގެ ޖީބު ތެރޭގައި އޮތް ސިނގިރޭޓު ފޮއްޓެއް ތެރޭގައި މަސްތުވާ ތަކެތި އަޅާފައި އޮތް ދަޅެއް އޮތް ކަމެއް އޭނާ އަށް ނޭނގެ ކަމަށެވެ.

އޭނާ މިހެން ބުނި ނަމަވެސް މި މައްސަލައިގައި ސައިފުالله ގެ ވަކީލުންގެ ޓީމުން މި ދައުވާ އާއި ދެކޮޅަށް އެއްވެސް ހެއްކެއް ހުށައަޅާފައި ނުވާކަމަށް ކްރިމިނަލް ކޯޓުގެ ނިންމުމުގައި ވެއެވެ.

އެހެންކަމުން ކްރިމިނަލް ކޯޓުން ސައިފުالله ގެ މައްޗަށް އިއްވި ހުކުމުގައި ބުނެފައި ވަނީ މި ދައުވާއަށް އޭނާ އިންކާރު ކުރި ނަމަވެސް މި މައްސަލައިގައި ހުށައެޅުނު ހުރިހާ ހެއްކާއި ޤަރީނާ ތަކުގެ އިތުރުން އެއީ މަސްތުވާ ތަކެތި ކަމަށް ޝައްކު ކުރެވޭ ތަކެތި ކަމަށް ސައިފުالله ވެސް އިންކާރު ކޮށްފައި ނުވާތީ  ފެނުނު ތަކެތީގެ އަސްލު ހިޒާޔަތު އޮތީ ސައިފުالله ގެ އަތުގައި ކަމާއި މެދު ޝައްކު އުފެދޭނެ ހާލަތެއް ނެތް ކަމަށެވެ.

މި ހުރިހާ ކަމަކަށް ރިއާޔަތްކޮށް ކްރިމިނަލް ކޯޓުން އޭނަ އެއްލައްކަ ރުފިޔާއިން ޖޫރިމަނާކޮށް އުމުރަށް ޖަލަށް ލުމަށް ވަނީ ހުކުމް ކޮށްފައެވެ.

ކެނަބިސް ޓްރެފިކް ކުރުމަކީ ގާނޫނީ ގޮތުން ބޮޑު ކުށެކެވެ. މި ކުށް ކުރިކަން ސާބިތު ވެއްޖެނަމަ ދިހަ މިލިއަން ރުފިޔާއިން ޖޫރިމަނާކުރުން ނުވަތަ އެއްލައްކަ ރުފިޔާއިން ޖޫރިމަނާކޮށް އުމުރަށް ޖަލަށް ލުމަށް ގާނޫނު ގައި ވަނީ ކަނޑައަޅާފައެވެ.