ރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރައިގައި ކްރިމިނަލް ކޯޓުގެ އިމާރާތަށް ފެންވަދެ ސާވާއަށް ލިބުނު ގެއްލުން ތަކާއި އެކު މިއަދު ބޭއްވުމަށް ހަމަޖެހިފައިވާ ހުރިހާ ޝަރީއަތެއް ކެންސަލްކޮށްފިއެވެ.

އެކޯޓުން ބުނީ ރެއިން ފެށިގެން މާލެއަށް ކުރަމުންދާ ވިއްސާރައިގައި، މިއަދު ހެނދުނުން ފެށިގެން ކްރިމިނަލް ކޯޓުގެ ސީލިންގުން ފެންވަދެ ކޯޓުގެ ސާވާ އެއްކޮށް ހަލާކުވެެފައިވާ ކަމަށެވެ. 

އެހެންކަމުން އިންޓަނެޓްގެ ޚިދުމަތް މެދުކެނޑި، އިދާރީ ގޮތުން ކުރަން ހުރި ކޯޓުގެ އެއްވެސް މަސައްކަތް މިއަދު ނުކުރެވި އަދި  ބާއްވަން ޝެޑިއުލްކޮށްފައިވާ ހުރިހާ ޝަރީއަތްތައް ވެސް ކްރިމިނަލް ކޯޓުން ވަނީ ކެންސަލް ކޮށްފައެވެ. އެހެންނަމަވެސް ބަންދުގެ މުއްދަތު ޖެހުމުގެ މަޖިލިސްތައް ބާއްވަމުންދާ ކަމަށް ކޯޓުން މައުލޫމާތުދެ އެވެ.

މީގެ ކުރިންވެސް ބޯކޮށް ވާރޭ ވެހޭ ދުވަސްތަކުގައި ކްރިމިނަލް ކޯޓުގެ ތެރެއަށް ފެންވަދެ، ސާވާ އަށް ގެއްލުން ލިބުމުގެ ސަބަބުން  ޝަރީއަތްތައް ކެންސަލްކޮށްފައިވާކަން ފާހަގަކޮށްލަން ޖެހެއެވެ.

ކްރިމިނަލް ކޯޓު ހިންގާ އިމާރާތް ބާވެ، އިމާރާތް ބަދަލުކުރުމަށް ޖުޑީޝަލް އެޑްމިނިސްޓްރޭޝަން ޑިޕާޓްމެންޓު (ޑީޖޭއޭ)އިން ވަނީ ކްރިމިނަލް ކޯޓު ހިންގުމަށް އިމާރާތެއް ކުއްޔަށް ހޯދުމަށް ޓެންޑާކޮށްދިނުމަށް އެދި ޓެންޑާ ބޯޑަށް ވެސް މީގެ ކުރިން ފޮނުވާފައެވެ.

ކްރިމިނަލް ކޯޓު އެންމެ ފުރަތަމަ ހިންގީ ޖަސްޓިސް ބިލްޑިން ގައި ނަމަވެސް ތަނުގެ ޖާގައިގެ ދަތިކަން ބޮޑުވުމުން މިހާރު އެ ކޯޓު ހިންގަމުން އަންނަނީ ތީމުގެއާ ޖެހިގެން ހުންނަ އިމާރާތުގައެވެ.