މިހާރު ރާއްޖޭގެ އެކި ކަންކޮޅުތަކަށް ކުރަމުން ދާ ވިއްސާރައިގައި ލިބެމުންދާ ގެއްލުން ކުޑަ ކުރުމަށް ކަމާ ބެހޭ ފަރާތްތަކާއި، އާންމު ރައްޔިތުން، ކުރަމުންދާ ބުރަ މަސައްކަތަކީ ޝުކުރު ހައްގު މަސައްކަތެއް ކަމަށް ނައިބު ރައީސް އަލްއުސްތާޒް ހުސައިން މުޙައްމަދު ލަތީފް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މިއަދު ކުރެއްވި ޓްވީޓެއްގައި އެވެ.
"ކުރަމުން މިދާ ވިއްސާރައިގައި ލިބޭ ގެއްލުން ކުޑަ ކުރުމަށް ޓަކައި ކަމާ ބެހޭ ފަރާތްތަކާއި އާންމު ރައްޔިތުން ވަރުބަލިކަމެއް ނެތި ކުރަމުންދާ ބުރަ މަސައްކަތަކީ ޝުކުރު ޙައްޤު މަސައްކަތެއް، ހަލިކަމާ އެކު މި ވިއްސާރަ އަލިވުމުގެ ހެޔޮ ތައުފީޤު މިންވަރު ކުރައްވާށި. امين"
ނައިބު ރައީސް ވިދާޅުވިއެވެ.
މީގެ އިތުރުންވެސް އެ މަނިކުފާނު ވިދާޅުވީ މާލެ ސިޓީއަށް މެދުކެނޑުމެެއް ނެތި ވާރޭވެހުމުގެ ސަބަބުން ފެންބޮޑުވެ ގެއްލުން ލިބުނު ބައެއް ގެތަކަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އާއި އެކު ޒިޔާރަތް ކޮށް، އެ ގެތަކުގެ މީހުންގެ ޙާލު ބަލާލެވުމަކީ ލިބުނު ވަރަށް ބޮޑު އުފަލެއް ކަމަށެވެ.
ވިއްސާރައިގައި ފެނުގެ އަސަރު ކުރި ގެތަކާއި ފިހާރަތަކާއި އެހެނިހެން ތަންތަނަށް ވެސް ކަމާ ބެހޭ ފަރާތްތަކުން ގުޅިގެން ވެލި ބަސްތާ ފޯރުކޮށްދިނުމުގެ މަސައްކަތް ކުރަމުން އަންނަކަން ފާހަގަ ކޮށްލަންޖެހެއެވެ. އަދި ރާއްޖޭގެ އެކި ކަންކޮޅުތަކަށް ވެސް މި ވިއްސާރައިގައި ލިބެމުންދާ ގެއްލުންތައް ހައްލު ކުރުމަށް ކަމާ ބެހޭ ފަރާތްތަކުންނާއި އާންމުން ގުޅިގެން ދަނީ ހަރަކާތްތެރި ވަމުންނެވެ.
Advertisement
This content is created and paid for by advertisers and does not involve Voice Journalists
