ބެޑްމިންޓަން އެކަޑަމީ އޮފް ނައިފަރުން އިންތިޒާމްކޮށްގެން ބާއްވާ ރާއްޖޭގެ އެންމެ އަގުބޮޑު ބެޑްމިންޓަން މުބާރާތް "ނައިފަރު އޯޕަން 2024" މިމަހުގެ އެއްވަނަ ދުވަހު ފަށައިފި އެވެ.

މިއަހަރުގެ މުބާރާތުގައި ދެ ޑްރޯއެއް ހިމެނޭއިރު، އޭގެތެރެއިން 19 އަހަރުން ދަށުގެ ޖޫނިއަރ ޑްރޯ ކުރިއަށްދަނީ މުޅި ރާއްޖެއަށް ހުޅުވާލައިގެންނެވެ. ނަމަވެސް މުބާރާތުގެ މެއިން ޑްރޯ ހުޅުވާލެވިފައި ވަނީ ނ. ރ. ބ. އަދި ޅ އަތޮޅަގެ ކުޅުންތެރިންނަށެވެ. 

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މީގެ އިތުރުން ޖޫނިއަރ ޑްރޯ ފަސް އުމުރުފުރާ އަކަށް ބަހާލެވިފައިވާ އިރު، އޭގެތެރޭގައި ހިމެނެނީ 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް އަދި 19 އަހަރުން ދަށުގެ ސިންގަލްސް އަދި ޑަބަލްސް އެވެ. ނަމަވެސް މެއިން ޑްރޯގައި ސިންގަލްސް އަދި ޑަބަލްސްގެ އިތުރުން މިކްސް ޑަބަލްސް އިވެންޓްތައް ހިމެނެއެވެ.

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

ނޮކްއައުޓް އުސޫލުން ކުރިއަށް ގެންދާ މިމުބާރާތުގައި ސިންގަލްސް އިވެންޓްތަކުގައި 115 ކުޅުންތެރިން ވާދަކުރަމުންދާއިރު، ޑަބަލްސް އިވެންޓްތަކުގައި 104 ކުޅުންތެރިއަކު ވާދަކުރެއެވެ. އަދި މުބާރާތުގެ ސިންގަލްސް އިވެންޓްތަކުގައި 116 މެޗު ކުޅޭއިރު، ޑަބަލްސް 69 މެޗު ކުޅުމަށް ވަނީ ހަމަޖެހިފައެވެ.

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މުބާރާތުގެ ވަނަތަކަށް 50,000 ރުފިޔާގެ ފައިސާގެ އިނާމު ހުދަހެޅިފައިވާއިރު، މެއިން ޑްރޯގެ ފިރިހެން ސިންގަލްސް ޗެމްޕިއަންކަން ހޯދާ ފަރާތަކަށް ފުށިފަރު މޯލްޑިވްސްގެ ފަރާތުން 2 މީހަކަށް 2 ދުވަހުގެ ރިސޯޓް ސްޓޭއެއް ހުށަހަޅާފައިވެއެވެ. އަދި މެއިން ޑްރޯގެ އަންހެން ސިންގަލްސް ޗެމްޕިއަންކަން ހޯދާ ފަރާތަކަށް ކޯރާކޯރާ މޯލްޑިވްސްގެ ފަރާތުން 2 މީހަކަށް 2 ދުވަހުގެ ރިސޯޓް ސްޓޭއެއް ހުށަހަޅާފައިވެއެވެ. އަދި މީގެ އިތުރުން ވެސް މުބާރާތުގެ ވަނަވަނައަށް ހޮވޭ ފަރާތްތަކަށް އަގުބޮޑު އިނާމުތަކެއް ވަނީ ހުށަހަޅާފައެވެ.

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މިމުބާރާތަކީ 2021 ވަނަ އަހަރު ބެޑްމިންޓަން އެކަޑަމީ އޮފް ނައިފަރު ރަޖިސްޓަރީ ކުރެވުނު ފަހުން އެ އެކަޑަމީގެ ފަރާތުން އިންތިޒާމްކޮށްގެން ބާއްވާ ދެވަނަ މުބާރާތެވެ. އެގޮތުން މިދިޔަ އަހަރުގެ މުބާރާތުގައި ވެސް ވާދަވެރި ގިނަ މެޗުތަކެއް ފެށިގެންދިޔައިރު، އެމުބާރާތުގައި ޒުވާން ވަރަށް ހުނަރުވެރި ކުޅުންތެރިންތަކެއް ވަނީ ފެނިގެން ގޮސްފައެވެ.

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މީގެއިތުރުންވެސް ނައިފަރު ބެޑްމިންޓަން އެކަޑަމީ ވުޖޫދަށް އައިފަހުން އެ އެކަޑަމީގެ ފަރާތުން އަންނަނީ މިކުޅިވަރު ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން ފާއިތުވެދިޔަ ދެ އަހަރެއްހާ ދުވަހުގެތެރޭގައި އެ އެކަޑަމީގެ ފަރާތުން ކޯޓު އޮފިޝަލުން އުފެއްދުމުގެ އިތުރުން ކާމިޔާބު މުބާރާތަކެއް ބާއްވާފައިވާއިރު، އިންޓަ ސްކޫލް މުބާރާތް، އިންޓަ ސްކޫލް ޗެމްޕިއަންސްލީގުގެ އިތުރުން ނޭޝަނަލް ޖޫނިއަރ ޗެމްޕިއަންޝިޕްގައި އެކަޑަމީގެ ކުޅުންތެރިން ވަނީ ފާހަގަކޮށްލެވޭ ގިނަ ކާމިޔާބީތަކެއް ހާސިލްކޮށްފައެވެ.

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މުބާރާތުގެ ކޯ ސްޕޮންސަރުންނަކީ، މިނިސްޓްރީ އޮފް ސްޕޯޓްސް ފިޓްނަސް އެންޑް ރެކްރިއޭޝަން، އެސްޓީއޯ އަދި ފުށިފަރު މޯލްޑިވްސް އެވެ. މުބާރާތުގެ އިވެންޓް ޕާޓްނަރުންނަކީ ފާދިއްޕޮޅު ނައިފަރު ކައުންސިލް، ފާދިއްޕޮޅު ނައިފަރު އަންހެނުންގެ ތަރައްގީއަށް މަަސައްކަތްކުރާ ކޮމެޓީ، ބެންކް އޮފް މޯލްޑިވްސް، ކޯރާކޯރާ މޯލްޑިވްސް، ނައިފަރު ސްކޫބާ ސެންޓަރ، އެޓްމޮސްފިއާ ކަނިފުށި އަދި އިސްލާމިކު ބޭންކް އެވެ. 

ނައިފަރު އޯޕަން 2024 މުބާރާތުގެ ތެރެއިިން/ ފޮޓޯ: އައި-ޝަޓަރ 

މުބާރާތުގެ ޑިޖިޓަލް ޕާޓްނަރަކީ ދިރާގެވެ. އަދި މީޑިއާ ޕާޓްނަރަކަށް ހަމަޖައްސާފައި ވޮއިސް އެމްވީ އެވެ. އަދި ސަޕޯޓިންގ ޕާޓްނަރުންނަކީ އައިކިޔުޔޫ، އައިސް އެންޑް ޖޯއީ، ރޮޒޭލިޔާ، ޗިލީ ގާޑެން، އެމްޔޫ ސްޓޯރު، އޮންލައިން ބިޒް ޕްރޯ، ޖޯޒީ އެމްވީ، ކޭލަން، މާލް، ބަޑީސް ނެޓް، އައިޝަޓާ، ޑީޖޭ ކައްޗޭ، އަދި އިޖޫ އެންޑް ޝާން އެވެ.