މާލޭގައި ބޯކޮށް ވާރޭވެހުމުގެ ސަބަބުން ދިމާވާ ފެންބޮޑުވުމުގެ މައްސަލަ ހައްލު ކުރުމަށް ދިރާސާތައް ކޮށް، ކުޅި އާއި ވެވު، މާލޭގައި އަލުން އުފައްދަން ޖެހޭ ކަމަށް، ދާދި ފަހުން ސިޔާސީ ދާއިރާއާއި ދުރަށް ޖެހިވަޑައިގެންނެވިކަން އިއުލާން ކުރެއްވި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ފާއިތުވެދިޔަ ދެތިން ދުވަހު މާލެއަށް ކުރި ވިއްސާރައިގައި ފެންބޮޑުވެ، ގޭގެއަށް ފެންވަދެ، ނަޖިސްތައްވެސް ފެނުގެ ތެރެއަށް ލީކުވެ ބޮޑެތި ގެއްލުންތަކެއް ވަނީ ވެފައެވެ. އެގޮތުން، ގޭގޭގައި ގެންގުޅޭ ސާމާނުތައް ހަލާލުވެ، 11 ޢާއިލާއެއް ވަގުތީ ހީޔާވައްސަށްވެސް ބަދަލުކޮށްފައި ވެއެވެ.
އެކަމާއި ގުޅިގެން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، މާލޭގައި މިހާރު ބޭނުން ކުރެވެމުންދާ ފެން ހިންދާ ނިޒާމަކީ ފެއިލް ވެފައިވާ ނިޒާމެއް ކަމަށެވެ. އަދި ކުރިއަށް އޮތް ތަނުގައިވެސް އެ ނިޒާމް ފެއިލް ވަމުންދާނެ ކަމަށް އެމަނިކުފާނު ލަފާކުރައްވައެވެ.
އޭގެ ހައްލަކަށް އެމަނިކުފާނު ދެއްކެވީ، ކުޅި ނުވަތަ ވެވު ފަދަ ގުދުރަތީ ވަސީލަތްތައް ބޭނުންކުރުމެވެ. އެގޮތުން އެމަނިކުފާނު ވަނީ ފެންބޮޑުވުމުގެ މައްސަލަ ހައްލު ކުރެވޭނީ ގުދުރަތީ ނިޒާމުގެ ތެރެއިން އުފަންކުރާ ކުޅި އާއި ވެވުން ކަމަށް ވިދާޅުވެފައެވެ.
"ގުދުރަތީ ނިޒާމުގެ ބޭނުން ހިފައި، މި މައްސަލަ ހައްލު ކުރަން އާ ޑިޒައިންތަކެއް ތައާރަފު ކުރަންޖެހޭ. މިސާލެއްގެ ގޮތުން، މާލޭގެ ކުޅިތަކާއި ވެވުތައް އަލުން ތައާރަފު ކުރެވިދާނެ،"
ރައީސް ނަޝީދު މިފަދައިން ވިދާޅުވެފައި ވާއިރު, ކުޅި އަކީ ފެންބޮޑުވުންފަދަ ހާދިސާ ތަކުންވެސް ރައްކާތެރިކޮށް، ރަށަށް ވެހޭ ފެން ހިންދުމުގައި އެހީތެރިވެދޭ އެއްޗެއް ކަމަށް ދިރާސާތަކުން ދައްކަ އެވެ.
ވެވަކީ އިހު ޒަމާނުގައި ފެންވެރުމަށް ހަދާ އުޅުނު، މިހާރު ހަދާފައި ހުންނަ ޕޫލް ފަދަ ވަޅުގަނޑުތަކެކެވެ. އޭގެ ވަށައިގެން ގައު ޖަހާފައި، އެތެރެއަށް އެރުމަށް ސިޑި ވެސް ރާނާފައި ހުރެއެވެ.
ބޭރު ގައުމު ތަކުގައި، ބޯކޮށް ވެހޭ ވާރޭ އެއްތަނަކަށް ޖަމާ ކުރުމަށް ވެވާއި އެއްގޮތް ވާ ފަދަ ޑިޒައިނަކަށް ތަންތަން ހަދާފައި ހުރެއެވެ. އެހެން ހެދުމުން، ވެހޭ ފެންތައް އެއަށް ޖަމާވެ، އޭގެ ތެރެއިން، ފެން ހިންދާ ނިޒާމުގެ ތެރެއަށް އެ ފެންތައް ދަތުރު ކުރެއެވެ.
Advertisement
This content is created and paid for by advertisers and does not involve Voice Journalists
