ރައީސް ޑރ. މުހައްމަދު މުއިއްޒުގެ ސަރުކާރަށް މިވަގުތު އެންމެ މުހިންމީ އިންޑީޔާ ސިފައިން ތިބި އަދަދު ނޫން ކަމަށާއި، އެހެން ނަމަވެސް މި ސަރުކާރަށް އެންމެ މުހިއްމީ ދިވެހިރާއްޖޭގައި ތިބި އިންޑިޔާ ސިފައިން ފޮނުވާލުމުގެ މަސައްކަތް ކަމަށް  ދިވެހި ސަރުކާރުން ބުނެފިއެވެ.

މިކަން ހާމަކޮށްފައި ވަނީ ރައީސުލް ޖުމުހުރިއްޔާގެ އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމުގައި ދިވެހި ނޫސްވެރިޔަކު ރާއްޖޭގައި ތިބި އިންޑީޔާގެ ސިފައިންގެ އަދަދާއި ގުޅޭގޮތުން ކުރެއްވި ސުވާލަކަށް ޖަވާބު ދެއްވަމުންނެވެ.

މިއަދުގެ މި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުالله ނާޒިމް ވިދާޅުވީ މުހިންމީ ސިފައިން ތިބި އަދަދެއް ނޫން ކަމަށާއި އެ މީހުން ފޮނުވާލުމުގެ މަސައްކަތް ކަމަށެވެ.

"އެންމެ ފަހުން ހާމަ ކުރި މައުލޫމާތުތަކުން ދައްކާ ގޮތުން ރާއްޖޭގައި ތިބީ 88 އިންޑިއާ ސިފައިން. މީގަ މުހިންމީ ތިބި އަދަދަށް ވުރެ ތިބިއްޔާ ތިބި ބަޔަކު ފޮނުވައިލުމުގެ މަސައްކަތް ކުރިޔަށް ދާކަން ރައްޔިތުންނަށް ކަށަވަރު ވުން،" ނޫސްވެރިޔާގެ ސުވާލަށް ޖަވާބު ދެއްވަމުން ނާޒިމް ވިދާޅުވި އެވެ.

 މި ސަރުކާރު ވެރިކަމަށް އައުމަށް ވީ އެންމެ ބޮޑު އެއް ވަޢުދަކީ ރާއްޖޭގައި މިވަގުތު ތިބި އިންޑިޔާ ސިފައިން ދިވެހިރާއްޖެއިން ފޮނުވާލުން ކަމަށް ވާއިރު އެކަން ކުރުމަށްޓަކައި މި ސަރުކާރު ވެރިކަމަށް އައި ފުރަތަމަ ދުވަހުން ފެށިގެން ވަރަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށް ސަރުކާރުން ވިދާޅުވެއެވެ.

އެގޮތުން މިއަދުގެ ނޫސްވެރިންގެ ބައްދަލުވުމުގައި ނާޒިމު ފާހަގަކުރެއްވި ގޮތުގައި މިކަމާއި ގުޅިގެން ތަފާތު ލެވަލްތަކުގައި 10 ބައްދަލުވުމެއް ބާއްވާފައިވާ ކަމަށާއި އިތުރު ބައްދަލުވުންތަކެއް ރާވަމުން އަންނަ ކަމަށެވެ.

ރާއްޖޭގައިތިބި އިންޑިޔާ ސިފައިން ފޮނުވާލުމުގެ މަސައްކަތް މި ސަރުކާރުން ވަރަށް ބާރަށް ކުރިއަށް ގެންދަވާ ކަމަށާއި އެކަމުގައި ދިވެހިރައްޔިތުން މާޔޫސްވެ ނުލެއްވުމަށް ދިވެހިރައްޔިތުންގެ ނާޒިމް ވަނީ އެދިވަޑައިގެންނަވާފައެވެ.