ފާއިތުވި ދުވަސްތަކުގައި މޫސުން ގޯސްވެ ވެހުނު ވިއްސާރައިގައި ހުޅުމާލޭގެ ސަހަރާގެ ބިންގަނޑުގައި ފެންހެދި، އަދިވެސް ނުހިނދޭތީ މީހުން ވަޅުލުން ވަގުތީ ގޮތުން މާލެ އާސަހަރާއަށް ބަދަލުކުރަން ނިންމައިފިއެވެ.

މިކަމާއި ގުޅިގެން މާލެ ސިޓީ ކައުންސިލުން ބުނީ މަރުވެފައިވާ މީހުން ވަޅުލުމަށް ކޮންނައިރު ހުޅުމާލެ ސަހަރާގެ ބިންގަނޑުން ފެންއަރަންފަށާކަމަށާއި އެހެންކަމުން ހުޅުމާލެ ސަހަރާގައި މީހުން ވަޅުލެވޭގޮތް ވެފައިނުވާކަމަށެވެ.

މި ފެންގަނޑު ހުޅުމާލެ ސަހަރާއިން ހިނދެން ހަފްތާއެއް ވަރު ނަގާނެ ކަމަށްވެސް ސިޓީ ކައުންސިލުން މައުލޫމާތުދެއެވެ. އެހެންކަމުން  ވިލިމާލެ އަދި ހުޅުމާލެގައި މަރުވާ މީހުން ވަގުތީގޮތުން ވަޅުލާން ހަމަޖެހިފައިވަނީ، އާސަހަރާގައިކަމަށް އެކައުންސިލުން ބުނެއެވެ.

ވަގުތީ ގޮތުން މައްޔިތުން އާސަހަރާގައި ވަޅުލުމަށް ނިންމި ކަމުގައިވިޔަސް ހުޅުމާލޭގައި މަރުވާ މީހުންގެ މޫނުދެއްކުން ކުރިޔަށްދާނީ ހުޅުމާލޭގައެވެ.

ރާއްޖޭގެ އެކި ކަންކޮޅުތަކަށް މި ހަފްތާ ކުރި ވިއްސާރައިގައި މާލޭގެ މަގުތަކުގައި ފެން ބޮޑުވެ ބައެއް ގެތަކަށް ފެނުގް އަސަރުކޮށް އެކި ވަރުގެ ގެއްލުންތައް ވެސް ވަނީ ވެފައެވެ.