ކުރިއަށް އޮތް ތިން މަސްދުވަހުގެ ތެރޭގައި އައްޑޫ ރީޖަނަލް ޕޯޓްގައި ބަންކަރިންގެ ހިދުމަތް ފަށަން ނިންމާފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
ދައުލަތުގެ މީޑިއާ، ޕީއެސްއެމަށް ދެއްވި އިންޓަވިއު އެއްގައި އެ ކުންފުނީގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ އައްޑޫ ޕޯޓް ބެލުމަށް ފަހުގައި މިހާރު ބަންކަރިންގެ ހިދުމަތް ދިނުމަށް މަސައްކަތް ކުރަމުންދާ ކަމަށެވެ.
"ބަންކަރިންގެ ހިދުމަތުގެ މާނައަކީ އެތަނަށަ އަންނަ ވެސެލްސް ތަކަށް ބޭނުންވާ ތެލާއި ފެނާއި މިހެން ގޮއްސަ ވަރަށް ގިނަ ކަންތައް ތަކެއް ހުންނާނެ. އެހެންވީމަ މިހާރު އަޅުގަނޑު ހަމަ ހާއްސަކޮށް އައްޑު އަތޮޅުގެ ރައްޔިތުނަށް އާންމުކޮށް އެރީޖަންގެ ރައްޔިތުންނަށް، ޔަގީންކަން ދެން ކުރިއަށް އޮތް ތިން މަސްދުވަހުގެ ތެރޭގައި އަޅުގަނޑުމެން އައްޑޫ ޕޯޓުން ބަންކަރިންގެ ހިދުމަތް ދޭނަން. "
ވަޖީހު ވިދާޅުވިއެވެ.
މީގެ އިތުރުންވެސް ވަޖީހު ވިދާޅުވީ ބަންކަރިންގެ ހިދުމަތް ދޭން ފެށުމުން އެ ޕޯޓަށް ލިބޭ އާމްދަނީ އިތުރު ވެގެން ދާނެކަމަށެވެ. ނަތީޖާ އަކަށް ވެގެން ދާނީ އިތުރު މުއައްޒަފުން ވެއްދި، ރައްޔިތުނަށް ވަޒީފާ ލިބި، މިހާރު އައްޑޫ ޕޯޓުގައި ތިބި މުއައްޒަފުންގެ މުސާރައަށް ހެޔޮ ބަދަލު ތަކެއް އައިސް ރައްޔިތުނަށް ފާގަތިކަން ލިބިގެން ދިއުން ކަމަށެވެ.
ވަޖީހު ވިދާޅުވީ އައްޑޫ ޕޯޓަކީ މިހާތަނަށް އެތަނަށް އަންނަންވާ ތަރައްގީ އާއި ލިބެންވާ ހިދުމަތްތައް އެންމެ އެކަށީގެންވާ ގޮތަށް ނުދެވި އޮތް ތަނެއް ނަމަވެސް މި ސަރުކާރުން މިހާރު އަމާޒު ހިފާފައި ހުރީ އައްޑޫ ޕޯޓްގެ ބޭނުން އެންމެ ރަނގަޅަށް ހިފޭ ގޮތަށް އެތަން ބައްޓަންކޮށް ހިދުމަތްތައް އިތުރުކުރުމަށް ކަމަށެވެ.
Advertisement
This content is created and paid for by advertisers and does not involve Voice Journalists
