ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި ވާދަ ނުކުރައްވާނެކަމަށް އެމްޑީޕީގެ ޗެއާޕާޝަން އަދި ނިމިދިޔަ ރައީސް ޞާލިޙް ސަރުކާރުގެ އެންމެ ބާރުގަދަ ވަޒީރުގެ ގޮތުގައި ފާހަގަ ކުރެވުނު ފައްޔާޒު އިސްމާޢިލް، ފަޔާ ވިދާޅުވެއްޖެއެވެ.
ފަޔާ މިފަދައިން ވިދާޅުވެފައިވަނީ ސަންގު ތީވީ ހަބަރައްފަހު ޕްރޮގްރާމް ގައި ވާހަކަފުޅު ދައްކަވަމުންނެވެ.
ފައްޔާޒު ވިދާޅުވި ގޮތުގައި މަޖިލިސް އިންތިހާބުގައި ވާދަ ނުކުރެއްވުމަށް ނިންމެވީ އެމްޑީޕީގެ ޗެއާޕާޝަން ކަމުގެ މަޤާމަކީ އެޕާރޓީގެ އެންމެ އިސްމަޤާމު ކަމަށްވެފައި އިދިކޮޅު ޕާރޓީއެއްގެ ގޮތުގައި އެޕާރޓީ ހިންގޭނީ ވަރަށް ވަގުތު ދީގެން ކަމަށް ވާތީ ކަމަށެވެ.
"އަސްލު އެމްޑީޕީގެ ޗެއާޕާޝަން ކަމުގެ މަޤާމަކީ ވަރަށް ޒިންމާދާރު މަޤާމެއް ، އެހެން ވަޒީފާއެއް ނުވަތަ އެހެން މަޤާމެއް އަދާކުރަމުން މިކަމެއް (ޗެއާރޕާޝަންކަމުގެ މަޤާމު) އަދައެއް ނުކުރެވޭނެ"
މަޖިލިސް އިންތިހާބުގައި ވާދަ ކުރެއްވުމާއި ގުޅޭގޮތުން ކުރެވުނު ސުވާލުގެ ޖަވާބުގައި ފަޔާ ވިދާޅުވިއެވެ.
މަޖިލިހުގެ އިންތިހާބުގައި ފައްޔާޒު ވާދަނުކުރެވުމަށް ނިންމެވިއިރު އެޕާރޓީގެ އިސް ސަފުގައި ހަރަކާތްތެރިވެލައްވާ ގިނަބޭފުޅުންތަކެއް ވަނީ މަޖިލިސް އިންތިޙާބުގައި ވާދަކުރެއްވުމަށް ޕާރޓީގެޓިކެޓް ހޯއްދެވުމަށް ހުށައަޅުއްވާފައެވެ.
އޭގެތެރެއިން ބައެއް ބޭފުޅުންނަށް ވަނީ ޕަރައިމަރީއަކާ ނުލައި މިހާރު ޕާރޓީގެ ޓިކެޓުވެސް ލިބި ވަޑައިގަންނަވާފައެވެ. އޭގެ ތެރޭގައި ނިމިދިޔަ ސަރުކާރުގެ ފެނަކަ ކުންފުނީގެ އެމްޑީ އަހްމަދު ސައީދު މުހައްމަދާއި، ނިމިދިޔަ ސަރުކާރުގައި ބޯހިޔާވަހިކަމުގެ މަޝަރޫޢުގައި އެންމެ ހަރަކާތްތެރިވެލެއްވި ކުރީގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އަދި ނިމިދިޔަ ސަރުކާރުގެ ފިނޭންސް މިނިސްޓަރު އިބްރާހިމް އަމީރު ހިމެނި ލައްވައެވެ.
Advertisement
This content is created and paid for by advertisers and does not involve Voice Journalists
