ކްރިމިނަލް ކޯޓުގެ ޝަރީޢަތްތައް ނުހިނގާތީ ޕްރޮސެކިއުޓާ ޖެނެރަލް (ޕީޖީ) ކަންބޮޑުވުން ފާޅުކުރައްވައިފިއެވެ.

ޕީޖީ އޮފީހުން ބުނީ ދާދި ފަހުން މާލެއަށް ވެހުނު ބޯ ވާރޭގައި، ކްރިމިނަލް ކޯޓު ހިންގާ ޢިމާރާތަށް ފެނުގެ އަސަރުކޮށް، ޝަރީޢަތްތައް ނުހިންގޭ ވަރަށް ޢިމާރާތަށް ގެއްލުންވެފައިވާތީ، ޝަރީޢަތްތައް ހިންގުން މަޑުޖެހިފައިވާކަމީ ޕީޖީ ކަންބޮޑުވާކަމެއް ކަމަށެވެ.

 މިމައްސަލަ ޙައްލުކޮށް، ކޯޓުގެ މަސައްކަތް ބާރަށް ކުރިއަށް ގެންދެވޭނެ ވަޞީލަތްތައް ހަމަޖައްސައި ދިނުމަކީ ދައުލަތުގެ ކަމާބެހޭ އެންމެހައި އިދާރާތަކަށް ޤާނޫނުއަސާސީން މަތިކޮށްފައިވާ ޒިންމާއެއްކަމަށާއި އެޒިންމާ އަދާކޮށް، ކޯޓުގެ ވަޞީލަތްތައް ރަނގަޅު ކޮށްދިނުމަށް ޕީޖީ ވަނީ އިލްތިމާސް ކުރައްވާފައެވެ.

ކްރިމިނަލް ކޯޓުގެ އެހީތެރިކަން ލިބިގެން، ރަަށްރަށުގެ މެޖިސްޓްރޭޓް ކޯޓުތަކުގައި ޝަރީޢަތްތައް ހިންގަނީ ޢާންމު ގޮތެއްގައި ހަފްތާއަކު އެއް ދުވަހުކަމަށް ވާތީ ޕީޖީ ވިދާޅުވީ އެ ދުވަސް ފިޔަވައި، އެހެން ދުވަސްދުވަހު، ރަށްރަށުގެ މެޖިސްޓްރޭޓް ކޯޓުތަކުގައި ހުރި މައްސަލަތައް ކުރިއަށް ގެންދެވޭނޭ އިންތިޒާމު ހަމަޖެހިފައިހުރީތީ، އެމައްސަލަތައް ބާރަށް ހިންގުމަކީވެސް ޕީޖީ ގެ އެދުމެއް ކަމަށެވެ.

ކްރިމިނަލް ކޯޓުގެ ސީލިންގުން ފެންވަދެ ކޯޓުގެ ސާވާ އެއްކޮށް ހަލާކުވެެފައިވާތީ ބޭއްވުމަށް ހަމަޖެހިފައިވާ ހުރިހާ ޝަރީއަތެއް ވަނީ ކެންސަލް ކޮށްފައެވެ.

އިންޓަނެޓްގެ ޚިދުމަތް މެދުކެނޑި، ޝަރީއަތްތައް ކެންސަލް ކުރުމުގެ އިތުރުން، އިދާރީ ގޮތުން ކުރަން ހުރި ކޯޓުގެ މަސައްކަތްތައް ވެސް ވަނީ މެދުކެނޑިފައެވެ. އެހެންނަމަވެސް ބަންދުގެ މުއްދަތު ޖެހުމުގެ މަޖިލިސްތައް ބާއްވަމުންދާ ކަމަށް ކޯޓުން މައުލޫމާތުދެ އެވެ.

މީގެ ކުރިންވެސް ބޯކޮށް ވާރޭ ވެހޭ ދުވަސްތަކުގައި ކްރިމިނަލް ކޯޓުގެ ތެރެއަށް ފެންވަދެ، ސާވާ އަށް ގެއްލުން ލިބުމުގެ ސަބަބުން  ޝަރީއަތްތައް ކެންސަލްކޮށްފައިވާކަން ފާހަގަކޮށްލަން ޖެހެއެވެ.