އިރާނުގެ ކެރްމާންގައި އިއްޔެ ހިނގި ބޮން ގޮއްވާލުމުގެ ހާދިސާ އާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އިރާނުގެ ސައްޔިދު އިބްރާހިމް ރައީސި އަށް ތައުޒިޔާގެ މެސެޖެއް ފޮނުއްވައިފިއެވެ.
ރައީސް ޑރ.މުއިއްޒު ފޮނުއްވި ތައުޒިޔާގެ މެސެޖްގައި ވަނީ އިއްޔެ ގޮއްވާލި ބޮމުގެ ހަމަލާގައި އެތައްސަތޭކަ ބަޔަކު ޝަހީދުވެ ޒަހަމްވި ހަބަރު އަޑުއެއްސެވީ ސިހުމާއި ބިރުވެރިކަމާއި އެކުގައި ކަމަށެވެ.
މީގެ އިތުރުންވެސް އެމަނިކުފާނު ވިދާޅުވީ އާންމުންނަށް ވިސްނާލުމެއް ނެތި ހަމަލާތައް އަމާޒުކުރުމަކީ ބައިނަލްއަގްވާމީ އިންސާނީ ހައްގުތަކާ ބެހޭ ގާނޫނުތަކާއި ހިލާފުވުން ކަމަށާއި ޓެރަރިޒަމްގެ މި އަމަލު ރާއްޖެއިން ހަރުކަށި އިބާރާތުން ކުށްވެރިކުރާ ކަމަށެވެ.
ރައީސް ޑރ.މުއިއްޒު ގެ މި މެސެޖް ނިންމަވާލައްވަމުން ވަނީ މި ހަމަލާގެ އަމާޒަކަށް ވި އާއިލާތަކަށާއި އާންމު ފަރުދުންނަށް ތައުޒިޔާ ވިދާޅުވެފައެވެ.
މީގެ އިތުރުންވެސް އެމަނިކުފާނު ވަނީ ޓެރަރިޒަމަށް މަގުފަހިވާ އެންމެހާ ކަންކަމާއި ރާއްޖެއިން އަބަދުވެސް ދެކޮޅުވެރިވާނެ ކަމަށާއި މިފަދަ އަނިޔާވެރި އަމަލުތަކަށް ދުނިޔޭގައި ޖާގައެއް ނެތް ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
