މިސްކިތްތައް ބެލެހެއްޓުން މިއަށްވުރެ ވަރުގަދަ ކުރަން ޖެހޭކަމަށް ކުރީގެ ބަންޑާރަނައިބު އަދި ޕީޕީއެންސީގެ ފަރާތުން މާލޭ ސިޓީގެ މޭޔަރު ކަމަށް ކުރިމަތިލައްވާފައިވާ، އާއިޝަތު އާޒިމާ ޝަކޫރު ވިދާޅުވެއްޖެއެވެ.
އާޒިމާ މިފަދައިން ވިދާޅުވީ ރޭ އޮތް ސަންގު ޓީވީގެ މާލޭ ސިޓީ މޭޔަރު ކަމަށް ކުރިމަތިލާފައިވާ ކެނޑިޑޭޓުންގެ ބަހުސް ޕްރޮގްރާމް ގައި ވާހަކަ ފުޅު ދައްކަވަމުންނެވެ.
"މިސްކިތް ތަކަކީ ހުރުމަތްތެރި ވެގެންވާ ތަންތަން. ހުރުމަތް އަޅުގަނޑުމެން ބަލަހައްޓަންވެސް ޖެހޭ ތަންތަން. މިސްކިތް ތައް ބެލެހެއްޓުން މިއަށްވުރެ ވަރުގަދަ ކުރަން ޖެހޭ. ފުލުހުންގެ އިންވޯލްވްމެންޓް ވެސް އަންނަންޖެހޭ. "
އާޒިމާ ވިދާޅުވިއެވެ.
މީގެ އިތުރުންވެސް އާޒިމާ ވިދާޅުވީ މިސްކިތް ތަކަކީ އިލްމީ ހަޒާނާއަށް ހުޅުވާލެވިފައިވާ ތަންތަން ކަމުގައި ވާންޖެހޭ ކަމަށާއި ދަރިވަރުންނަށް ގުރުއާން ކުލާސް ތަކާއި އެކިއެކި އިލްމީ ޕްރޮގްރާމް ތައް މިސްކިތްތަކުގައި ހިންގުމަކީ އެކަމަނާގެ ސިޔާސަތެއް ކަމަށެވެ.
އާޒިމާ މިފަދައިން ވިދާޅުވެފައި ވަނިކޮށް ދާދި ފަހުން މާލޭގެ ޒިކުރާ މިސްކިތުގެ އެތެރެއަށް ބިސްތަކެއް ތަޅާލި މައްސަލަ ވަނީ ފެންމަތި ވެފައެވެ. މިމައްސަލައިގެ މިކަން ކުރި މީހާ ފުލުހުން ދެނެގަނެފައިވާއިރު، އެއީ ނަފްސާނީ ގޮތުން ބަލި މީހެއް ކަމަށް ފުލުހުން ބުނެއެވެ.
ސައްތައިންސައްތަ އިސްލާމީ މި ގައުމުގައި ގަސްތުގައި މިސްކިތްތައް ހަޑިކުރާ މައްސަލަ އާއި މިސްކިތަށް އިހާނެތިވާނެ ފަދަ ކަންކަން ކުރުން ވަނީ އިތުރުވެއިވާތީ އެކަން ހައްލު ކުރުމަށް މިހާރުގެ ރައީސުލްޖުމްހޫރިއްޔާ ޑރ.މުޙަައްމަދު މުއިއްޒު، މާލެ ސިޓީގެ މޭޔަރު ކަމުގައި ހުންނެވިއިރު މިސްކިތްތަކު ގައި ސެކިއުރިޓީ ކެމެރާ ހަރުކޮށް މިސްކިތްތައް ބެލެހެއްޓުން ވަނީ އިތުރު ކޮށްފައެވެ.
Advertisement
This content is created and paid for by advertisers and does not involve Voice Journalists
