ރައިސުލްޖުމުހުރިއްޔާ ޑރ. މުހައްމަދު މުއިއްޒުގެ ވެރިކަމުގެ މި ފަސްއަހަރު ނިމިގެންދާއިރު މާލޭގައި ގޮދޮރު ނުލިބޭ އެއްވެސް މީހަކު ނުހުންނާނެކަމަށް އެމަނިކުފާނު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅިވެފައިވަނީ މާލޭގެ މޭޔަރު ކަމަށް ޕީއެންސީގެ ފަރާތުން ވާދަކުރައްވާ އާއިޝަތު އާޒިމާ ޝަކޫރުގެ ކެމްޕެއިން މެނިފެސްޓޯ އިފުތިތާހު ކުރުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މި ސަރުކާރުން ކުރިއަށް ގެންދިއުމަށް ފަށާފައިވާ ބޯހިޔާވަހިކަމާއި ގުޅޭގޮތުން އެމަނިކުފާނު ވިދާޅުވީ ގެދޮރުވެރިކަމުގެ މައްސަލައަކީ މާލެ ސަރަހައްދަށް އޮތް އެންމެ ބޮޑު މައްސަލަ ކަމަށާއި، އެހެންވެ، މި ސަރުކާރުން ބާރު ސްޕީޑުގައި މަސައްކަތް ކުރަނީ އެ ކަމަށް އަވަސް ހައްލެއް ހޯދުމަށް ކަމަށެވެ.
ބޯހިޔާވަހިކަމުގެ މަޝްރޫޢުތަކުގެ ތަފްޞީލް ދެއްވަމުން ރޭގެ ޖަލްސާގައި އެމަނިކުފާނު ވިދާޅުވީ ހުޅުމާލޭގެ ތިންވަނަ ފިޔަވަހީގެ ބިމާއި ގުޅީފަޅާއި ގިރާވަރު ފަޅު ހިއްކުމުގެ މަސައްކަތް ބާރަށް ކުރިއަށް ގެންދާ ކަމަށާއި އެ ތަންތަން ހިއްކާނީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ހިއްކަން ނިންމި ވަރަށް ވުރެ ބިން ވެސް އިތުރުވާ ގޮތަށް ކަމަށެވެ. މީގެ އިތުރުން އެމަނިކުފާނުގެ ބޯހިޔާވަހިކަމުގެ އުންމީދާއި ގުޅިފައިވާ ރަސްމާލެ މަޝްރޫޢުގެ ވާހަކަ ވެސް ވަނީ ފާހަގަ ކުރައްވާފައެވެ.
"ސަތޭކަ ޕަސެންޓަށް މިރޭ ވެސް ޔަގީންކަން މި ދެނީ. މި ދައުރުގެ ފަސް އަހަރު ނިމޭއިރު މި ހަތަރު ބިމުން އުފެދޭ ޖާގައާ އެކު އެ ލިބޭ ގޯއްޗާއި ފްލެޓް ލިބިގެން ދިޔައީމާ މި މާލެއަކު ނުހުންނާނެ ގެދޮރުގެ މައްސަލަ ހައްލު ނުވާ އެކަކު ވެސް،"
ރައީސް ވިދާޅުވިއެވެ.
މީގެ އިތުރުން ދިވެހި ރައްޔިތުންގެ ބޯހިޔާވަހިކަމަށްވެސް އެމަނިކުފާނު ވަނީ ޔަޤީންކަން ދެއްވާފައެވެ.
"ހަމަ އެންމެ ދިވެހި ރައްޔިތަކު ވެސް ނުހުންނާނެ، އިރާދަކުރެއްވިއްޔާ 100 ޕަސެންޓް ޔަގީންކަން މި ދެނީ. މާލެއަކު ނުހުންނާނެ ގެދޮރުގެ މައްސަލަ ހައްލު ނުވާ އެކަކު ވެސް." .
ރައީސް ޑރ. މުއިއްޒު ވިދާޅުވިއެވެ
މާލޭ ރައްޔިތުންގެ ކިބައިން އެމަނިކުފާނު އެދިވަޑައިގެންނެވީ އެމަނިކުފާނުގެ ގޮދޮރުވެރިކަމުގެ ވަޢުދު ބާރު ސްޕީޑުގައި ފުރިހަމަ ކުރުމަށް މޭޔަރުކަމުގެ ގޮޑިއަށް ސަރުކާރުގެ ކެންޑިޑޭޓު އުސްތާޛާ އާޒިމާ މާލޭ މޭޔަރުކަމަށް އިންތިހާބު ކޮށްދެއްވުމަށެވެ.
Advertisement
This content is created and paid for by advertisers and does not involve Voice Journalists
