ރެކްޓަ މިންގަނޑުން 5.6 މެގްނިޓިއުޑްގެ ބާރުމިނުގައި ބިންހެލުމެއް އައްޑޫ ސިޓީ ކައިރީގައި އޮންނަ ކާލްސްބާގް ރިޖަށް އަތުވެއްޖެއެވެ.

އައްޑޫ ސިޓީއާ 894 ކިލޯމީޓަރު ދުރުން އައި މި ބިންހެލުމުގެ އަސަރެއް ރާއްޖެއަށް ނުކުރާނެ ކަމަށް މޫސުމާއި ބެހޭ އިދާރާ (މެޓް) އޮފީހުން ބުނެއެވެ.

ބިންހެލުން އައިސްފައިވަނީ މިއަދު ހަވީރު 4:46 ގައި ކަމަށް އެ އިދާރާއިން މައުލޫމާތުދެއެވެ.

މީގެ އެއް ހަފްތާ ކުރިން މިދޔަ އަހަރުގެ ޑިސެންބަރު މަހުގެ 29 ވަނަ ދުވަހުވެސް އައްޑޫ ސިޓީ އާއި  900 ކިލޯ މީޓަރު ދުރުން 4 ބިންހެލުމެއް ވަނީ އައިސްފައެވެ. އެހެންނަމަވެސް މި ބިންހެލުންތަކުގެ އަސަރެއް ރާއްޖެއަށް ނުކުރާ ކަމަށާއި، އަދި ބިންހެލުންތަކާއި ގުޅިގެން، ސުނާމީގެ އަސަރު ވެސް ނުކުރާނެ ކަމަށް މެޓް އޮފީހުން އޭރު ވަނީ ބުނެފައެވެ.

މީގެ އިތުރުންވެސް މި އަހަރުގެ ފުރަތަމަ ދުވަހު ޖަޕާނަށް އައި 7.4 މެގްނިޓިއުޑް ގެ ބާރު މިނުގެ ބިންހެލުމުގެ އަސަރުވެސް ރާއްޖެއަށް ކޮށްފައިނުވާކަމަށް މޫސުމާއި އިދާރާއިން ބުނެއެވެ. ރާއްޖެއަށް އަސަރު ނުކުރި ނަމަވެސް މި ބިންހެލުމުގެ ސަބަބުން ޖަޕާނަށް ވަނީ ސުނާމީ އެއް އަރައި މިހާތަނަށް 92 މީހަކު މަރުވެ 242 މީހަކު ގެއްލިފައެވެ.