މާލޭގެ ހުރިހާ މަގެއް ހެދުމުގެ ޕްލޭން އެއް ވަރަށް އަވަހަށް އިއުލާން ކުރައްވާނެ ކަމަށް ޕީއެންސީގެ ފަރާތުން މާލޭގެ މޭޔަރު ކަމަށް ކުރިމަތިލައްވާފައިވާ ކެނޑިޑޭޓް، ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވެއްޖެއެވެ.
އެކަމަނާ މިފަދައިން ވިދާޅުވީ މިރޭ އޮތް ޕީއެސްއެމްގެ މާލެ މޭޔަރު ކަމަށް ކުރިމަތި ލައްވާފައިވާ ބޭފުޅުންގެ މެދުގައި ކުރިއަށް ދިޔަ ބަހުސް ގައެވެ.
"މާލޭގެ މަގުތަކަށް ބަލައިފި ކަމުގައި ވިއްޔާ، މާލޭގެ މަގުތައް އެކުގައި ރީޑިވެލޮޕް ކުރަން ޖެހޭ، އެއީ އަޅުގަނޑުމެން ގަބޫލު ކުރަން ޖެހޭ ކަމެއް. އޭގެ ތެރޭގައި ފެން ހިންދުމުގެ ނިޒާމާއި ނަރުދަމާ އާއި ހަމަ އެއާއި އެކުގައި މާލޭގެ މަގުތަކުގައި ވަޅުލަމުން ގެންދާ ކަރަންޓާއި އެހެން ޚިދުމަތް ތަކަށް ބޭނުންވާ ހޮޅިތައް އެކުގައި ވަޅުލާފައި އެކީ އެއްފަހަރާ މާލޭގެ ހުރިހާ މަގެއް ހެދުމުގެ ޕްލޭނެއް ވަރަށް އަވަހަށް އަޅުގަނޑުމެން އިއުލާން ކުރާނަން."
އާޒިމާ ވިދާޅުވިއެވެ.
މީގެ އިތުރުންވެެސް އެކަމަނާ ވިދާޅުވީ މާލޭގެ މޭޔަރެއްގެ ޒިންމާއަކީ ހަމައެކަނި މާލެ ނޫންކަމަށާއި ވިލިމާލެ ވިޔަސް ފުރަ މާލެ ވިޔަސް އެއީ ޒިންމާ އެއް ކަމަށެވެ.
މިގޮތުން އާޒިމާ ވިދާޅުވީ ހުޅުމާލެ ފޭސް އެކަކީ ސްޓޯމް ވޯޓާ ޑްރެނޭޖް ސިސްޓަމާއި އެކުގައި ހެދި ތަނެއް ނަމަވެސް މިދިޔަ ފަސް އަހަރު ތެރޭގައި މެނޭޖް ނުކުރެވިގެން ގޮސް މިހާރު ވާރޭ ވެހިއްޖެނަމަ ހުޅުމާލެ މަގުތަކުގައި ފެން ބޮޑުވާކަމަށެވެ.
ހަމައެއާއިއެކު ހުޅުމާލޭ ފޭސް 2 ގެ މިހާރު މަގުތަކުގެ ހަނި ކަމަށް ބަލާ، އެއަށް ވުރެ ރަނގަޅު ހައްލު ތަކެއް އެމަގުތަކަށް ހޯދަން ޖެހޭ ކަން ވެސް އެކަމަނާ ފާހަގަ ކުރެއްވިއެވެ. ހުޅުމާލޭގެ އިތުރުންވެސް ވިލިމާލޭގެ މަގުތައް ހުރީ އެންމެ ފުރަތަމަ ހެދި ގޮތަށް ގާ އަޅާފައި ކަމަށާއި މިހެންކަމުން ވިލިމާލެ މަގުތައް އަލުން ހެދުމުގެ ޕްލޭނެއް އިއުލާން ކުރައްވާނެ ކަމަށް ވެސް އާޒިމާ ވިދާޅުވިއެވެ.
އާޒިމާ އިތުރަށް ވިދާޅުވީ މާލޭގެ ސަރަހައްދުގައި މީހުން ދިރިއުޅޭ ތަންތަނުގެ މަގުތައް ރަނގަޅު ކުރުމުގެ ޕްރޮގްރާމް ތަކަކީ ކުރަން ޖެހޭ ކަމެއް ކަމަށާއި އެކަން ކުރަން ޖެހޭނީ ވެހިކަލްތައް ދުއްވާއިރު ހަށިގަނޑަށް އިތުރަށް އަންނަން ޖެހޭ އަނިޔާ ނުލިބޭ ގޮތަށް ކަަމަށެވެ. ޕްލޭން އަކީ އަލުން އަބަދު އަބަދު ކޮންނަން ނުޖެހޭ ގޮތަކަށްމުޅި މާލޭގެ ހުރިހާ ހިސާބެއްގެ މަގުތައް ރީޑިވެލޮޕް ކޮށް މައްސަލަތައް ހައްލުކުރުން ކަމަށް ވެސް އެކަމަނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
