ނިމިދިޔަ ރިޔާސީ އިންތިހާބުގައި ވޯޓު ގުނަމުން ދިޔަ އިރު ޞައްޙަ ވޯޓާއި ބާތިލު ވޯޓުގެ މައްސަލަ ހުރިކަން ފާހަގަ ކުރެވި، އެކަންތައްތައް ރަނގަޅުކުރުމަށް ކުރަންޖެހޭ ކަންތައްތައް ފާހަގަކޮށްފައިވާ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފިއެވެ.
އީސީއިން މިފަދައިން ބުނެފައިވަނީ އެ ޢިދާރާގެ ފަރާތުން ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އިލެކްޝަންސް ކޮމިޝަން (އީސީ) ނައިބު ރައީސް އިސްމާއިލް ޙަބީބެވެ.
"ވޯޓު ގުނަމުން ދިޔަ އިރު ސައްހަ ވޯޓާއި ބާތިލު ވޯޓުގެ މައްސަލަ އެބަހުރި، އެކަމުގެ ދިރާސާއެއް ކޮމިޝަނުން މިހާރު ކޮށް ނިންމައިފި. އެ ދިރާސާގެ އަލީގައި ވަރަށް ގިނަ ކަންކަމަށް ބަދަލު އެބަ އާދޭ. އެއީ ވޯޓުލާ މަރުކަޒުގައި އަޅުގަނޑުމެން ބައިތިއްބާ އޮފިޝަލުންނަށް ތަމްރީނު ދިނުމުގައި އިތުރަށް ބަލަން ޖެހޭ ކަންކަން ފާހަގަ ވެފައި ހުރީ. އެކަމާ ބެހޭ ގައިޑްލައިނެއް މިހާރު ތައްޔާރުކުރެވިފައި އޮތީ،" މިއަދުގެ ނޫސްވެރިންގެ ބައްދަލުވުމުގައި ހަބީބް ވިދާޅުވި އެވެ.
ހަބީބު އިތުރަށް ވިދާޅުވީ ބާތިލު ވޯޓު މަދުކުރުމަށް ޓަކައި ކުރަން ޖެހޭ ވަރަށް ގިނަ ކަންތައްތައް ހުރިކަން އީސީއަށް ފާހަގަ ކުރެވިފައިވާ ކަމަށާއި، އޭގެ ތަފްސީލުތައް އިލެކްޝަންސް ކޮމިޝަން (އީސީ) އިން ފަހުން ހާމަކުރައްވާނެ ކަމަށެވެ.
އީސީއިން މިފަދައިން ބުނެފައިވާއިރު ނިމިދިޔަ ރިޔާސީ އިންތިހާބުގައި ބާތިލް ވޯޓްގެ މައްސަލާގައި ޢާއްމުންގެ ވަރަށް ގިނަ ޝަކުވާތަކެއް ކަމާބެހޭ ފަރާތްތަކަށް ހުށައަޅާފައި ވެސް ވެއެވެ.
Advertisement
This content is created and paid for by advertisers and does not involve Voice Journalists
