ވަޒީރުންގެ މަޖިލީހުގެ މަޝްވަރާއާއި އެކު ރައީސުލް ޖުމުހުރިއްޔާއަށް ލިބިދޭ ބާރުގެ ދަށުން ދިވެހިރާއްޖޭގައި ޑިވެލޮޕްމަންޓް ބޭންކެއް ޤާއިމްކުރުމަށް އޮތޯރިޓީއެއް އުފެއްދެވުމަށް ރައީސުލްޖުމްހޫރިއްޔާ ނިންމަވައިފިއެވެ.
މިކަން ހާމަކުރައްވާފައިވަނި ރައީސުލް ޖުމުހުރިއްޔާގެ އޮފީހުގައި މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުالله ނާޒިމް އިބްރާހިމްއެވެ.
މިބައްދަލުވުމުގައި ނާޒިމު ވިދާޅުވީ ރައީސުލް ޖުމުހުރިއްޔާއަށް ލިބިދޭ ބާރުގެ ދަށުން މޯލްޑިވްސް އިންޓަނޭޝަނަލް ފައިނޭންސް ސަރވިސް އޮތޯރިޓީގެ ނަމުގައި އޮތޯރިޓީއެއް އުފެއްދެވުމަށް ރައީސުލްޖުމްހޫރިއްޔާ ނިންމަވާ، މިކަމާއި ގުޅޭ ޤަވާއިދުތައް އެކުލަވާލުމުގެ މަސައްކަތް ކުރައްވަމުން ގެންދަވާކަމަށެވެ.
"މޯލްޑިވްސް އިންޓަނޭޝަނަލް ފައިނޭންސްޝަލް ސަރވިސް އޮތޯރިޓީގެ ނަމުގައި އޮތޯރިޓީއެއް އުފެއްދެވުން. އަދި އޮންޝޯރ ބޭންކިންގެ އޮޕަރޭޝަން ލައިސަންސް ދިނުމަށް މޯލްޑިވްސް މަނިޓަރީ އޮޓޯރިޓީން ޤަވާއިދެއް އެކުލަވާލެއްވުމަށްފަހު މިޤަވާއިދުގެ ދަށުން މި އޮތޯރިޓީގެ މަސައްކަތްތައް ކުރިއަށްގެންދިއުން. އަދި ހަމަ އެއާއިއެކު އިންޓަނޭޝަނަލް ފައިނޭންޝަލް ސެންޓަރުތައް ޤާއިމްކުރުމާއި ބެހޭ ޤާނޫނެއް ވުޖޫދަށް ގެނައުމަށްޓަކައި އެކަމާއި ބެހޭ ބިލެއް ޑްރާފްޓްކޮށް އެ ބިލް ރައްޔިތުންގެ މަޖިލީހަށް ހުށައަޅައިގެން ފާސްކުރުމުގެ މަސައްކަތް ކުރިއަށްގެންދެވުން."
އަބްދުالله ނާޒިމް އިބްރާހިމް
މިކަންތައްތައް ކުރުމަށްޓަކައި އޮންލައިން ޕޭމަންޓް ޕްލެޓްފޯމް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމުގެ މަސައްކަތް ކުރިއަށް ގެންދިއުމަށް މަސައްކަތްތައް ފެށުމަށް މިއަދު ބޭއްވުނު ވަޒީރުންގެ މަޖިލިހުން ނިންމަވާފައިވާކަމަށް ނާޒިމް ވިދާޅުވިއެވެ.
އޮންލައިން ޕޭމަންޓް ޕްލެޓްފޯމެއް ޤާއިމު ކުރުމުގެ މަސައްކަތް ކުރެވެމުންދާއިރު ހަމަ އެއާއި އެކުއެކީގައި ސައިބަރ ސެކިއުރިޓީއާއި ގުޅޭ ޚާއްސަ ބިލެއް ޑްރާފްޓް ކުރުމުގެ މަސައްކަތް ކުރައްވާނެކަމަށް ސަރުކާރުން ވަނީ ވިދާޅުވެފައެވެ.
"ރާއްޖޭގެ ސައިބާސެކިއުރިޓީ ވަރުގަދަ ކުރުމަށްޓަކައި ސަރުކާރަށް މިހާރު އެހީތެރިކަން ދެއްވުމަށް ތައްޔާރަށް އޮތް ދެޤައުމު ކަމުގައިވާ ޔުނައިޓެޑް އަރަބް އެމިރޭޓްސް އާއި އަދި ތުރުކީވިލާތާއި އެކު މިކަމާއި ގުޅޭ ގޮތުން މަޝްވަރާތައް ކުރިއަށް ގެންގޮސް، ސައިބާ ސެކިއުރިޓީ އިންފްރާސްޓްރަކްޗަރ ތަރައްގީކޮށް ކެޕޭސިޓީ ބިލްޑްކޮށް ކުރަންޖެހޭ އެންމެހާ ކަންކަން ކުރުމަށް މިއަދުގެ ވަޒީރުންގެ މަޖިލީހުގައި ނިންމުނު." ވަޒީރުންގެ މަޖިލިހުގެ ނިންމުމާއި ގުޅޭގޮތުން މިއަދުގެ ނޫސްވެރިންގެ ބައްދަލުވުމުގައި ނާޒިމު ވިދާޅުވިއެވެ.
ނާޒިމް މިގޮތައް ވިދާޅުވެފައިވާ އިރު ރައީސުލް ޖުމުހުރިއްޔާ ޑރ. މުހައްމަދު މުއިއްޒު ވެރިކަމަށް ވަޑައިގަންނަވަމުން ވިދާޅުވެފައިވަނީ އެމަނިކުފާނަށް ވެރިކަން ލިބި ވަޑައިގެންފި ނަމަ ޒަމާނީ ވިޔަފާރީގެ ތެރެއިން އޮންލައިން ވިޔަފާރީގެ ފުރުޞަތު ފުޅާކޮށް ތަނަވަސް ކޮށްދެއްވާނެކަމަށެވެ.
Advertisement
This content is created and paid for by advertisers and does not involve Voice Journalists
