އާދަޔާ ޚީލާފު ހިތްގައިމުކަމަކާއި، ޤުދުރަތީ ރީތި ކަމެއް ލިބިފައިވާ ހދ. ކޭލަކުނުގައި އިކޯ ޓޫރިޒަމްގެ މަސައްކަތް ފެށުމަށް ރައީސް ޑރ. މުޙައްމަދު މުއިއްޒުގެ ސަރުކާރުން ނިންމަވައިފިއެވެ.

މިކަން ހާމަކުރައްވާފައިވަނީ ރޭ ރައީސުލް ޖުމުހުރިއްޔާގެ އޮފީހުން ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ ޢަބްދުالله ނާޒިމް އިބްރާހިމެވެ.

ރޭގެ ނޫސްވެރިންގެ ބައްދަލުވުމުގައި ނާޒިމް ވިދާޅުވީ ރާއްޖޭގައި ހިމާޔަތްކޮށްފައިވާ ތަންތަނަކީ ރައްޔިތުންނަށް އިޤްތިޞާދީ މަންފާ ލިބޭނެ ތަންތަން ކަމުގައި ހެދުމަށްޓަކައި ކުރާ މަސައްކަތުގެ ދަށުން، ހދ. ކޭލަކުނުގައި އިކޯ ޓޫރިޒަމްގެ މަސައްކަތް ފެށުމަށް ވަޒީރުންގެ މަޖިލީހުގައި މަޝްވަރާކުރެއްވުމަށްފަހު ސަރުކާރުން ނިންމަވާފައިވާ ކަމަށެވެ.

ރޭގެ މި ނޫސްވެރިންގެ ބައްދަލުވުމުގައި ނާޒިމު އިތުރަށް ވިދާޅުވީ ، ހދ. ކޭލަކުނު އިކޯ ޓޫރިޒަމަށް ތަރައްޤީކުރާއިރު އެރަށުގެ ގުދުރަތީ ރީތިކަމާއި މޫދުގެ ދިރުންތަކަށް ގެއްލުން ނުވާނޭ ގޮތަކަށް، ރަށް ތަރައްޤީކުރުމަށް މިނިސްޓްރީ އޮފް ކްލައިމެޓް ޗޭންޖް އެންވަޔަރަމެންޓް އެންޑް އެނާޖީއާއި އަދި ކަމާ ގުޅޭ އެހެނިހެން ފަރާތްތަކާއި ގުޅިގެން މަޝްވަރާ ކުރެވެމުން ދާކަމަށާއި، އަދި ރަށަށް ޒިޔާރަތްކުރާ ފަރާތްތަކަށް ޚާއްސަކޮށްގެން ތިމާވެއްޓާއި ރައްޓެހި ޒަމާނީ ފެންވަރުގެ ވިޒިޓަރ ސެންޓަރެއް ޤާއިމުކުރުމުގެ މަސައްކަތް ކުރިއަށް ގެންދިއުމަށް ސަރުކާރުން ނިންމަވާފައިވާކަމަށެވެ.

"ކޭލަކުނުގެ ތާރީޚާއި، ރަށުގައި ހުރި ތާރީޚީ ތަންތަނާއި ރަށުގެ ވަށައިގެންވާ ދިރުންތަކުގެ މައުލޫމާތު ދެވޭނޭ އިންތިޒާމް ޤާއިމުކުރުމަށް ވާނީ ނިންމަވާފައި. ތިބޭފުޅުންވެސް ކުޑަކޮށް ދިރާސާ ކޮލީމަ އެނގިލައްވާނެ ކޭލަކުނަކީ ވަރަށް ބޮޑު ތާރީޚެއް އެކުލެވިފައިވާ ރަށެއް. އެއްޒަމާނެއްގައި މީހުން އާބާދުވެ އުޅުނު ރަށެއްގެ ގޮތުގަ އެރަށް ވަނީ." ތަފުޞީލް ދެއްވަމުން ނާޒިމް ވިދާޅުވިއެވެ.