ކްރިމިނަލް ކޯޓުގެ ޢިމާރާތަށް ލިބިފައިވާ ގެއްލުމުގެ ސަބަބުން އެ ކޯޓުގެ ޝަރީޢަތްތައް ހިންގުން މަޑުޖެހިފައިވާތީ، އެކަމަށް އަވަސް ޙައްލެއް ހޯދުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށް ދައުލަތުގެ އެޓަރނީ ޖެނަރަލް އަޙްމަދު އުޝާމް ވިދާޅުވެއްޖެއެވެ.
އުޝާމް މިފަދައިން ވިދާޅުވެފައި ވަނީ މާލޭގެ ބައެއް ކޯޓު ޢިމާރާތްތަކުގެ ހާލަތު ބައްލަވައި ލެއްވުމަށް މިއަދު ކުރެއްވި ޒިޔާރަތުގައި ކުރިމަނަލް ކޯޓަށް ވަޑައިގެން ހުންނަވައެވެ.
ދައުލަތުގެ އެޓަރނީ ޖެނަރަލްގެ އޮފީހުން މަޢުލޫމާތު ދެއްވާފައިވާ ގޮތުގައި އޭޖީ އަޙްމަދު އުޝާމް މިއަދު ޒިޔާރަތް ކުރައްވާފައި ވަނީ ކްރިމިނަލް ކޯޓާއި ސިވިލް ކޯޓާއި ފެމިލީ ކޯޓުގެ އިމާރާތްތަކަށެވެ.
އޭޖީ އުޝާމް މިއަދު ކޯޓުތަކުގެ ހާލަތު ބައްލަވާލެއްވުމަށް މި ކުރެއްވި ޒިޔާރަތުގައި އުޝާމްގެ އަރިހުގައި ރައްޔިތުންގެ މަޖިލީހުގެ މެމްބަރު އަދި ޖޭއެސްސީގެ ރައީސް، ހިސާން ހުސެއިން އާއި ޗީފް ޖުޑީޝަލް އެޑްމިނިސްޓްރޭޓަރު އައިޝަތު ރިޒްނާގެ އިތުރުން، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ބޭފުޅުން ބައިވެރިވެ ވަޑައިގެންފައި ވެއެވެ.
ކުރިމިނަލް ކޯޓަށް ގެއްލުން ވެފައިވަނީ މިދިޔަ ހަފުތާގެ އާދިއްތަ ދުވަހު މާލެއަށް އާދަޔާ ޚިލާފަށް ވާރޭވެހި ފެން ބޮޑުވުމުގެ ސަބަބުންނެވެ. އެދުވަހު އެ ކޯޓުން ބުނެފައިވަނީ ވިއްސާރައިގެ ސަބަބުން ކޯޓުގެ އިންޓަނެޓުގެ ޚިދުމަތް ކެނޑި ޝަރީއަތްތައް ކުރިއަށް ގެންދިއުމަށް ހުރަސް އެޅިފައިވާ ކަމަށެވެ.
ކުރިމިނަލް ކޯޓުގެ ޝަރީއަތްތައް މަޑުޖައްސާލަން ޖެހުމާއި ގުޅިގެން ޕީޖީ ޝަމީމު ވެސް ވަނީ ކޮން ބޮޑުވުން ފާޅު ކުރައްވާފައެވެ.
Advertisement
This content is created and paid for by advertisers and does not involve Voice Journalists
