އިގިރޭސި އެފްއޭކަޕްގެ ތިންވަނަ ބުރުގައި ހޯމަ ދުވަހުގެ ރޭ ރަށުން ތިންވަނަ ޑިވިޝަންގެ ވިގަން އެތްލެޓިކް އާއި ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް މެންޗެސްޓާ ޔުނައިޓެޑުން މުބާރާތުގެ ހަތަރުވަނަ ބުރުން ޖާގަ ހޯދައިފިއެވެ.

މިއީ މެންޗެސްޓާ ޔުނައިޓެޑް އެންމެ ފަހުން ކުޅުނު 10 މެޗުގެ ތެރެއިިން އެޓީމު މޮޅުވި ތިންވަނަ މެޗެވެ. އޭގެތެރެއިން ފަސް މެޗުން އެޓީމު ބަލިވެފައިވާއިރު، ދެ މެޗު ނިމިފައިވަނީ އެއްވަރުވެގެންނެވެ.

އިގިރޭސި ތިންވަނަ ޑިވިޝަން ލީގު ތާވަލުގެ 18 ވަނައިގައި މިވަގުތު އޮތް ވިގަން އާއި ދެކޮޅަށް މެންޗެސްޓާ ޔުނައިޓެޑުން އެޓީމުގެ އެންމެ ވަރުގަދަ އެގާރަ ނެރުނުއިރު، މެޗުގެ ފުރަތަަމަ ހަމަލާ ފެނިގެންދިޔައީ ވިގަންގެ ފަރަތުންނެވެ. އެގޮތުން މެޗު ފެށިގެން ތިންވަނަ މިނެޓުގައި ވިގަންގެ ނޯވޭ މިޑްފީލްޑަރު ތެލޯ އާސްގާޑް އަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ ޔުނައިޓްޑްގެ ކީއްޕަރު އޮނާނާ ވަނީ ހުޝިޔާރުކަމާއެކު ދިފާއުކޮށްފައެވެ.

Advertisement

މި ހަމަލާއަށް ފަހު ޔުނައިޓްޑުން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން އެޓީމުގެ ސްކޮޓްލޭންޑް މިޑްފީލްޑަރު ސްކޮޓް މެކް ޓޮމިނޭ އާއި އިގިރޭސި ފޯވާޑް މާކަސް ރަޝްފޯޑް އަށް ލިބުނު ފުރުސަތުތަކުގެ ބޭނުން ނުކުރެވި ދިޔައިރު، ފުރަތަަމަ ހާފުގެ 22 ވަނަ މިނެޓުގައި އެޓީމަށް ލީޑު ހޯދައިދިނީ ޕޯޗުގަލްގެ ޑިފެންޑަރު ޑިއޯގޯ ޑަލޮޓް އެވެ. މިއީ ރަޝްފޯޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި އެޓީމުގެ ލީޑު ފުޅާކުރުމަށް ރަޝްފޯޑްގެ އިތުރުން ޑެންމާކުގެ ފޯވާޑް ރަސްމުސް ހޮއިލަންޑް އަށް ލިބުނު ހުސް ފުރުސަތުތަކުގެ ބޭނުން ނުކުރެވި ދިޔައިރު، އެޓީމުގެ ޒުވާން ފޯވާޑް އަލްޖެންޑްރޯ ގަނާޗޯ އަށް ލިބުނު ފުރުސަތުގައި ވިގަންގެ ޕެނަލްޓީ އޭރިއާ ބޭރުން އޭނާ ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޔުނައިޓެޑުން އެޓީމުގެ އެޓޭކުތައް އިތުރަށް ވަރުގަދަކުރި އިރު، މިހާފުގައި ވެސް އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އަދި މިމެޗުގައި ޔުނައިޓެޑުން ލީގު ފުޅާކުރި ލަނޑު ދެވަނަ ހާފުގެ 74 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ބްރޫނޯ ފެނާންޑޭޒް އެވެ. މިއީ އެޓީމަށް ލިބުނު ޕެނަލްޓީއެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ. އަދި މުބާރާތުގެ ހަތަރުވަނަ ބުރުން ޔުނައިޓެޑް ވާދަކުރަންޖެހެނީ އިގިރޭސި ހަތަރުވަނަ ޑިވިޝަންގެ ނިއުޕޯޓް އާއި ފަސްވަނަ ޑިވިޝަންގެ އީސްޓްލޭ ވާދަކުރާ ރީޕްލޭ މެޗުން މޮޅުވާ ޓީމަކާއި ދެކޮޅަށެވެ. މިދެޓީ ނިއުޕޯޓްގެ ދަނޑުގައި ކުޅުނު މެޗު ނިމިފައި ވަނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.