އިންޑިޔާގެ ލަކްޝަދީބަކީ ފަތުރުވެރިން ގިނައިން ޒިޔާރަތްކުރާ ތަނަކަށް ހެދުމަށް ވަކާލާތުކުރައްވާނެ ކަމަށް ކުރީގެ އިކޮނަމިކް މިނިސްޓަރު އަދި އިދިކޮޅު އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެ އެވެ. 

ފައްޔާޒު މިފަދައިން ވިދާޅުވީ އިންޑިއާގެ "ސީއެންއެން ނިއުސް-18" ޗެނަލަށް ދެއްވި ބަސްދީގަތުމެއްގައި، ލަކްޝަދީބުގެ ސަބަބުން ރާއްޖޭގެ ފަތުރުވެރިކަމަށް އެއްވެސް ނޭދެވޭ އަސަރެއް ކުރާނެ ކަމަށް ގަބޫލު ކުރައްވާތޯ ނޫސްވެރިޔާ ކުރި ސުވާލަށް ޖަވާބު ދެއްވަމުން ނެވެ. 

މިއާއެކު ފައްޔާޒު ވިދާޅުވީ، ލަކްޝަދީބަކީ ރާއްޖޭގެ ފަތުރުވެރިކަމަށް އޮތް ސީދާ ނުރައްކަލެއް ނޫން ކަމަށާ،  ސުލްހަވެރި ވާދަވެރި ކަމަކީ އޭނާވެސް މަރުހަބާ ކިޔާ ކަމެއް ކަމަށެވެ. 

އަދި އިންޑިޔާގެ ބޮޑުވަޒީރު ނަރެންދުރަ މޯދީ އެތަނަށް ޒިޔާރަތްކޮށް އެތަން ޕްރޮމޯޓް ކުރުމަކީ އެއްވެސް މައްސަލައެއް ނޫން ކަމަށެވެ. ނަމަވެސް މޯދީ މީސްމީޑިއާގައި ކުރެއްވި ޕޯސްޓުތަކާ ގުޅިގެން ރާއްޖެ ބޮއިކޮޓުކޮށް، ރާއްޖޭގެ ފަތުރުވެރިކަމާއި އިޤުތިޞާދު ފުނޑައިލަން ގޮވައިލި އިންޑިއާ މީހުން އެފަދައިން ގޮވައިލީ "އިންޑިއާ އައުޓް" ހަރަކާތުގެ ސަބަބުންކަމަށް ސިފަކުރައްވައި، ފައްޔާޒު ވިދާޅުވީ އެކަމާއި ގުޅިވައި ރާއްޖޭގެ ޑެޕިއުޓީ މިނިސްޓަރުން ކުރެއްވީވެސް ގަބޫލު ކުރެވޭ ކަމެއް ނޫން ކަމަށެވެ. އަދި އެފަދައިން ކަން ކުރި ދިވެހިންނަކީ ގަމާރުންކަމަށާއި، "ކްލައުނުން"ތަކެއް ކަމަށް ފައްޔާޒު ސިފަކުރެއްވިއެވެ. 

މިއާއެކު ފައްޔާޒު ވިދާޅުވީ އޭގެ ސަބަބުން ފަތުރުވެރިކަމަށް ކުރާނެ ނޭދެވޭ އަސަރާމެދު ކަންބޮޑުވެވަޑައިނުގަންނަވާ ކަމަށާ އެހެންނަމަވެސް އޭނާ ބޮޑަށް ކަންބޮޑުވެވަޑައިގަންނަވަނީ ދެ ޤައުމުގެ ރައްޔިތުންގެ މެދުގައި އުފެދިފައިވާ ނުތަނަވަސްކަމާމެދު ކަމަށެވެ.

އިންޑިއާގެ ބައެއްގެ ގޮތުގައި އޮންނަ ލަކްޝަދީބަކީ ދިވެހިރާއްޖެއާއި ތަބީއީ ގޮތުން އެއްގޮތް އަތޮޅުތަކަކެވެ. ހުދު ވެލީގެ ގޮނޑުދޮށްތަކެއް ލިބިފައިވާ އެ އަތޮޅުތަކަކީ ރާއްޖޭގެ ބަދަލުގައި އިންޑިއާ މީހުންނަށް ދަތުރުކުރެވިދާނެ މަންޒިލެއްގެ ގޮތުގައި ޕްރޮމޯޓުކުރަން ފެއްޓީ މޯދީއެވެ.