ދާރިސް ޓީވީގެ ސްޓޭޝަން މެނޭޖަރު، އަދި ގިނަ އަދަދެއްގެ މަދަހަތައްވެސް މީގެ ކުރިން ކިޔުއްވާފައިވާ، ޢަލީ ރަމީޒު، އޭނާ މީގެ 23 އަހަރު ކުރިން ނެރުނު "ތިޔައޭ ރަސޫލަކީ" މަދަހަ އަލުން ނެރެފިއެވެ. 

2000 ވަނަ އަހަރު، ޢަލީ ރަމީޒު ނެރުއްވި އެ މަދަހައިގެ އައު ވާޝަންއެއް ރޭ ނެރެފައި މިވަނީ، މަދަހަ ކިޔުމާއި ދުރުގައި ހުންނެވުމަށްފަހު، "ޓަޗް ހުރިތޯ ބަލާލަން" މަދަހައިގެ ތަންކޮޅެއް ކިޔުއްވައި މީސްމީޑިއާއަށް ދޫކޮށްލުމުން ލިބުނު ތަރުހީބާއިއެކު، އާއްމުންގެ ގިނަ ފަރާތްތަކުން އެކަމަށް އެދިފައި ވާތީއެވެ. 

އެގޮތުން، މިފަހަރު ނެރުނު މަދަހައިގެ ރާގަށްވެސް ކުޑަ ބަދަލެއް ޢަލީ ގެނެސްފައިވާއިރު، މަދަހައިގެ ކިޔުންގަނޑުގެ އިތުރުން އެންމެ ފާހަގަކޮށްލެވުނު އަނެއް ކަމަކީ ވީޑިއޯ އިން ފެންނަމުންދިޔަ ރިވެތި ކުރެހުންތަކެވެ. 

މުހައްމަދު ސިރުހާން، އާއްމު ނަމުން ނަމަ، "ސިރު އާޓްސް"، ކުރަހާފައިވާ، ސިޔަރަތުގެ ހަދާންތައް އައު ކުރުވާ އެ ކުރެހުންތަކަށް އެންމެންވެސް އަންނަނީ ތަޢުރީފް ކުރަމުންނެވެ. އަދި ކުރެހުންތަކުގެ ސަބަބުން މަދަހައަށް އިތުރު ފުރިހަމަ ކަމެއް ގެނެސްފައިވާކަމަށްވެސް މީހުން ބުނެފައިވެއެވެ. 

ތިޔައޭ ރަސޫލަކީ މަދަހައިގެ ބައެއް ކުރެހުންތައް-- ފޮޓޯ/ސިރު އާޓްސް

މިފަހަރުގެ މަދަހައިގެން ރިކޯޑިންގ އާއި، މިކްސިންގ އަދި މާސްޓަރިންގ ހަދާފައިވަނީ ހޭވައްލާ ސްޓޫޑިއޯ އިންނެވެ.

އެ މަދަހަ އަކީ، އާދަމް ހަލީމް އަދްނާން ލިޔުއްވާފައިވާ މަދަހައެކެވެ. 

އިތުރު ފުރިހަމަ ކަމާއިއެކު "ތިޔައޭ ރަސޫލަކީ" މަދަހަ ރޭ ނެރުމާއި އެކު މިހާތަނަށް، ފޭސްބުކުން އެ މަދަހަ 40,000 އަށްވުރެ ގިނަ ފަހަރު ބަލާފައިވާއިރު، 2000 އަށްވުރެ ގިނަ ޝެއާރްސް އާއި، 5700 އަށްވުރެ ގިނަ ލައިކްސް އަދި 600 އަށްވުރެ ގިނަ ކޮމެންޓު މަދަހައިގެ ޕޯސްޓަށް ކޮށްފައިވެއެވެ. އަދި ކޮމެންޓް ކުރި އެންމެންވެސް މަދަހަ ރީތި ކަމަށް ބުނެފައިވެއެވެ.