ރައީސުލްޖުމުހޫރިއްޔާ ޑރ މުހައްމަދު މުޢިއްޒަށް، ޗައިނާގެ ރައީސް ޝީ ޖިންޕިން ރަސްމީކޮށް މަރުހަބާ ދަންނަވައިފި އެވެ.

ރައީސް ޝީގެ ދައުވަތަކަށް ރައީސް މުއިއްޒާއި އަނބިކަނބަލުން ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން އެ ގައުމުގެ ވެރިރަށް ބެއިޖިން އަށް ވަޑައިގެންނެވީ އިއްޔެ އެވެ.

އަދި ރައީސުލްޖުމްހޫރިއްޔާގެ ދެކަނބަލުން ޗައިނާގެ ވެރިރަށް ބެއިޖިންގގައި ހުންނަ ގްރޭޓް ހޯލް އޮފް ދަ ޕީޕަލްއަށް ވަޑައިގަތުމުން، ޗައިނާގެ ރައީސް ޝީ ޖިންޕިންގެ ދެކަނބަލުން ވަނީ ރަތްދޫލައިގެ ހޫނު މަރުޚަބާއެއް ދަންނަވާފައެވެ.

އަދި ދެ ޤައުމުގެ ޤައުމީ ސަލާމް ކުޅެފައިވާއިރު، ރައީސް ޑރ. މުޢިއްޒުގެ ޝަރަފުގައި ގާޑް އޮފް އޮނާއެއް ވަނީ އަރުވާފަ އެވެ.

ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅަކީ ޗައިނާގެ ރައީސް ޝީ ޖިންޕިން ގެ ދަޢުވަތަކަށް ކުރައްވާ ދަތުރުފުޅެކެވެ. މިއީ ރައީސުލްޖުމްހޫރިއްޔާކަމުގެ މަޤާމާއި ޙަވާލުވެވަޑައިގަތުމަށްފަހު އެމަނިކުފާނު ޗައިނާއަށް ކުރައްވާ ފުރަތަމަ ދަތުރުފުޅުވެސްމެއެވެ.