ކުޑަކުއްޖަކަށް ޖިންސީ ގޯނާ ކުރި މައްސަލައިގައި ހައްޔަރު ކުރި ފިލްމީތަރި މުހައްމަދު ޔުނާން ޝަރުތުތަކާއެކު ބަންދުުން ދޫކޮށްލީ ގާނޫނާ ހިލާފަށް ކަަމަށް ހައިކޯޓުން މިއަދު ބުނެފިއެވެ.

ހުޅުމާލެ ކޯޓުން ޝަރުތުތަކަކާއި އެކު ޔުނާން ދޫކޮށްލީ މިދިޔަ އަހަރުގެ ޑިސެންބަރު މަހުގެ 14 ވަނަ ދުވަހުއެވެ.

މި މައްސަލަ އިސްތިއުނާފް ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ވަނީ ހައި ކޯޓަށް ހުށައަޅާފައެވެ. މިގޮތުން މި މައްސަލަ އާއި ގުޅިގެން ހައި ކޯޓުން ބުނީ ޔުނާން ބަންދުން ދޫކޮށްލާފައިވާ މުއްދަތުގައި، ދަށު ކޯޓުން ކޮށްފައިވާ ޝަރުތުތަކާ ޚިލާފުވެއްޖެނަމަ، އޭނާ ބަންދުކުރެވޭނެ ކަމަށް އަމުރުގައި ބަޔާންކޮށްފައިވީ ނަމަވެސް ޔުނާންގެ އާއިލީ ކުޑަކުދިންނާއި ނުވަތަ މުޖުތަމަޢުގައި ދިރިއުޅޭ އެހެން ކުޑަކުއްޖަކާ ބައްދަލުވުމުގެ އިޙްތިމާލު މި މައްސަލައިގައި ނެތިގެން ދާކަމަށް ނުދެކޭ ކަމަށެވެ. އަދި އެފަދަ ކަމެއް ހިނގައިފިނަމަ އަލުން  ޔުނާން ބަންދުކުރުމުގެ ފުރުޞަތު އޮތްނަމަވެސް، މުޖުތަމަޢުގައި ދިރިއުޅޭ ކުޑަކުދިންގެ މަސްލަޙަތާއި ރައްކާތެރިކަން ހިމާޔަތްކުރެވޭ ކަމަށް ނުފެންނަ ކަމަށް ވެސް ހައިކޯޓުން ވަނީ ބުނެފައެވެ.

Advertisement

މީގެ އިތުރުންވެސް އެ ކޯޓުން ބުނީ ޔުނާން ބަންދުން ދޫކޮށްލާފައިވަނީ، މުޖުތަމަޢުގެ ސަލާމަތަށްޓަކައި ބަންދުކުރި ޙާލަތު ބަދަލުވެގެން ނޫންކަމަށާއި އޭނާ ބަންދުން ދޫކޮށްލުމުގައި ދަށު ކޯޓުން ކޮށްފައިވާ ޝަރުޠުތަކަކީ ، މުޖުތަމަޢުގެ ސަލާމަތާއި ރައްކާތެރިކަން ކަށަވަރުކުރެވޭފަދަ ޝަރުޠުތަކެއްކަމަށް ނުފެންނާތީ، މިއީ ޤާނޫނީ ހަމަތަކާ ޚިލާފަށް ދަށު ކޯޓުން ނިންމާފައިވާ ނިންމުމެއް ކަމަށެވެ. އެހެންކަމުން އިސްތިއުނާފުކުރެވިފައިވާ ދަށު ކޯޓުގެ އަމުރު ބާޠިލްކުރަންޖެހޭ ކަމަށް ވެސް ހައިކޯޓުގެ ނިންމުމުގައި ވަނީ ބުނެފައެވެ.

އެެހެންކަމުން ހުޅުމާލެ މެޖިސްޓްރޭޓް ކޯޓުގެ އަމުރު ބާތިލުކޮށް ޔުނާން ބަންދުކުރުމަށް އެދި ޕީޖީގެ ފަރާތުން މައްސަލަ ބަލާ، ދަށު ކޯޓަށް އަމުރުނެރޭ ދުވަހުން ފެށިގެން ހަފްތާއެއްގެ ތެރޭގައި ހުށަހަޅައިފިނަމަ އެ ހުށަހެޅުމާމެދު އެ ކޯޓުގެ ޤަޟިއްޔާގައި ކަނޑައަޅާފައިވާ އުސޫލުގެތެރެއިން އެކަށީގެންވާ އަވަސް މިނެއްގައި ގޮތެއް ކަނޑައެޅުމަށް މައްސަލަ ބަލުމަށް ދަށު ކޯޓަށް ވަނީ އަމުރުކޮށްފައެވެ.

މި މައްސަލައިގައި މި ފަދައިން ހުކުމް ކޮށްފައި މިވަނީ މައްސަލަ ބެއްލެވި ތިން ފަނޑިޔާރުން ކަމުގައިވާ އިސްފަނޑިޔާރު ޙުސައިން ޝަހީދާއި، ފަނޑިޔާރު ޙުސައިން މަޒީދު ގެ އިތުރުން ފަނޑިޔާރު ދީބާނާޒް ފަހުމީ ގެ އިއްތިފާގުންނެވެ.

2019 ވަނައަހަރާއި 2020 ވަނަ އަހަރުގެ ތެރޭގައި އެކި ދުވަސްމަތިން ކުޑަކުދިންތަކަކަށް ޖިންސީ ގޯނާކުރުމުގެ ތުހުމަތުގައި ޔުނާން އާއި އޭނާގެ އަނބިމީހާ ފާތިމަތު ރިހުލާ ހައްޔަރުކޮށް، ދައުވާކުރީ ޑިސެމްބަރު 2020 ގައެވެ. އަދި މިދިޔަ އަހަރުގެ މާޗް މަހު ރިހުލާ ވަނީ ގޭބަންދަށް ބަދަލުކޮށްފައެވެ.