ޗައިނާ ސަރުކާރުން ރާއްޖެއަށް 1000 ސްކޮލަރޝިޕްގެ ފުރުޞަތު ދެއްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ޗައިނާއަށް މިހާރު ކުރައްވަމުން ގެންދަވާ ދަތުރުފުޅުގައި މިވަގުތު ޗައިނާގައި ދިރިއުޅޭ ދިވެހިންނާ ބައްދަލުކުރައްވާ މިރޭ ދެއްކެވި ވާހަކަފުޅުގައެވެ.

މިއީ އެއް ޤައުމަކުން މިހާތަނަށް މިހާ ގިނަ ސްކޮލަޝިޕްގެ ފުރުޞަތު ލިބިގެން ދިޔަ ފަހަރުކަން މި ފުރުޞަތުގައި ފާހަގަކޮށްލަން ޖެހެއެވެ.

މިރޭ ޗައިނާގައި ތިބި ދިވެހިންނާއި ބައްދަލު ކުރައްވާ ރައީސް ޑރ. މުހައްމަދު މުއިއްޒު ދެއްކެވި ވާހަކަ ފުޅުގައި ވަނީ ޗައިނާއިން ރާއްޖެއަށް މި ދެއްވި 1000 ސްކޮލަރޝިޕްގެ ބައެއް ތަފްޞީލްތައް ހިއްސާ ކުރައްވާފައެވެ.

އެގޮތުން ރައީސް ވިދާޅުވީ ޗައިނާ ސަރުކާރުން ދެއްވި އެ 1000 ސްކޮލަރޝިޕަކީ 5 އަހަރު ދުވަހަށް ބަހާލައިގެން ސިވިލް ސަރވިސް މުވައްޒަފުންނަށް ދެއްވުމަށް ނިންމާފައިވާ ސްކޮލަރޝިޕް ތަކެއްކަމަށާއި، އެގޮތުން ކޮންމެ އަހަރަކުވެސް 200 ދިވެހިންނަށް ފުރުޞަތު ދެއްވާނެކަމަށް ރައީސް ވަނީ ވިދާޅުވެފައެވެ.

ރައީސް މިހާރު  ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި ވަނީ އެކި ދާއިރާތަކުން ދެޤާއުމުގެ ދެމެދުގައި ގުޅުން ބަދަހިކުރުމަށް އެއްބަސްވުންތަކުގައި ޗައިނާއާއެކު ސޮއިކުރައްވާފައެވެ. އޭގެތެރޭގައި ޢުމްރާނީ، އިޤްތިޞާދީ އަދި ފަންނީ ދާއިރާ ހިމެނެއެވެ.

ރައީސް ޑރ. މުހައްމަދު މުއިއްޒާއި ޗައިނާގެ ރައީސް ޝީ ޖިންޕިން ރޭ ބޭއްވެވި ރަސްމީ ބައްދަލުކުރެއްވުމުގައި ވަނީ ދެޤައުމުގެ ދެމެދު ގުޅުންބަދަހިކުރެއްވުމަށް މުހިންމު ދާއިރާތަކުން މަޝްވަރާ ކުރައްވާފައެވެ. އަދި މި މަޝްވަރާތަކަކީ ކާމިޔާބު އަދި ރާއްޖެއށް ފައިދާހުރި މަޝްވަރާތަކެއް ކަމަށް ދިވެހި ސަރުކާރުން ހާމަކުރައްވައެވެ.

ޗައިނާގެ ރައީސް ޝީ ޖިންޕިން ގެ ދައުވަތަކަށް ރައީސުލްޖުމްހޫރިއްޔާއާއި އެމަނިކުފާނުގެ އަނބިކަނބަލުން ކުރައްވަމުން މި ގެންދަވާ ފުރަމާނަ ދަތުރުފުޅުގައި ދިވެހިންނާ ބައްދަލު ކުރެއްވުމަށް ބޭއްވެވި ބައްދަލު ކުރެއްވުމުގައި ވަނީ ޗައިނާގައި ދިރިއުޅޭ ދިވެހިންނަށް ދިމާވާ ދަތިތައް އޮޅުން ފިލުއްވާފައެވެ. އަދި ރައީސް ވަނީ އެ ދަތިތައް ޙައްލުކޮށް ދެއްވުމަށް މަސައްކަތް ކުރައްވާނެ ކަމަށް ވިދާޅު ވެފައެވެ.

ޗައިނާގެ ސަރުކާރުންވެސް ބުނެފައިވަނީ މިހާރަށް ވުރެ ލުއި ފަސޭހަ ގޮތްތަކެއް ދިވެހިންނަށް ހަމަޖައްސަވައި ދެއްވާނެކަމަށެވެ.