ޗައިނާގެ ހިލޭ އެހީގައި ވިލިމާލޭގައި 100 އެދުގެ ހޮސްޕިޓަލެއް އެޅިގެން ދާނެކަމުގައި ރައީސުލް ޖުމުހުރިއްޔާ ޑރ.މުހައްމަދު މުއިއްޒު ވިދާޅު ވެއްޖެއެވެ.
ސަރުކާރުގެ ފަރާތުން މާލޭ މޭޔަރުކަމަށް ވާދަކުރައްވާ ޕީއެންސީގެ ކެންޑިޑޭޓް އަލްއުސްތާޛާ އައިޝަތު އާޒިމާ ޝަކޫރަށް ތާޢިދު ހޯއްދެވުމަށް ޗައިނާގައި ހުންނަވާ ރައީސް ޑރ.މުހައްމަދު މުއިއްޒު ދެއްވިޚިތާބެއްގައި ވިދާޅުވީ މި ސަރުކާރުގެ ފަރާތުން ވިލިމާލޭގެ ރައްޔިތުންނަށް ޓަކައި ނުހަނު ގިނަ ގުނަ ކަންތައްތަކެއް މިވީ ކުޑަ ދުވަސްކޮޅުގެ ތެރޭގައިވެސް ކޮށްދެއްވާފައިވާނޭ ކަމަށެވެ.
އެގޮތުން ވިލިމާލޭ ފަޅުގައި އާޅަފައިވާ ތެޔޮ ބާޖުތައް ނަގާ ހުޅުމާލެއަށް ބަދަލުކުރުމުގެ ޢަމަލީ މަސައްކަތް ފެށިގެން ކުރިއަށް ދާކަމަށް ވިދާޅުވިއެވެ. އަދި ވިލިމާލޭ ހޮސްޕިޓަލުގެ މަސައްކަތްވެސް ބާރު ސްޕީޑުގައި ކުރިއަށް ދާކަމަށް އެމަނިކުފާނު ވިދާޅުވިއެވެ.
"ހޮސްޕިޓަލުގެ މަސައްކަތް އިރާދަ ކުރެއްވިއްޔާ ޗައިނާގައި، މިހާރު އަޅުގަނޑުމެން މި ސޮއިކުރި އެއްބަސްވުންތަކުގެ ތެރޭން މިވަނީ މަގުފަހިވެފައި ، ހިލޭ އިރާދަ ކުރެއްވިއްޔާ އެހޮސްޕިޓަލް، 100 އެދުގެ ޓާރޝަރީ ހޮސްޕިޓަލް އެޅިގެންދާނެ "
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ޑރ. މުހައްމަދު މުއިއްޒު ވިދާޅުވީ އެމަނިކުފާނު ހިންގަވާ ތަރައްޤީގެ މަސައްކަތްތައް ކުރިއަށް ގެންދަން ބޭނުންފުޅު ވެލައްވަނީ ލާމަރުކަޒީ ޤާނޫނުގެ ތެރެއިންކަމަށް ވާއިރު ސަރުކާރަށް ތާޢިދުކުރައްވާ ކެންޑިޑޭޓަކު މާލޭގެ މޭޔަރެއްގެ ގޮތުގައި އިޚްތިޔާރު ކުރުމަކީ ވަރަށް މުޙިއްމުކަމެއް ކަމުގައެވެ.
އެހެންކަމާއި އެކު އެމަނިކުފާނުގެ ޚިޠާބުގައި ވިލިމާލޭގެ ރައްޔިތުންގެ ކިބައިން އެދިލެއްވީ މި ސަރުކާރުގެ ތަރައްޤީގެ މަސައްކަތް މަޑު ނުޖެހި ކުރިއަށް ގެންދިއުމަށްޓަކައި މޭލޭ މޭޔަރަކު ހޮވުމަށް މާދަމާ ބާއްވާ އިންތިހާބުގައި ސަރުކާރުގެ ކެންޑީޑޭޓް އާޒިމާއަށް ވޯޓް ދެއްވުމަށެވެ.
Advertisement
This content is created and paid for by advertisers and does not involve Voice Journalists
