މިއަދު ކުރިއަށްދާ މާލެ ސިޓީ ކައުންސިލްގެ ބައި އިލެކްޝަންގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސްކަން ވެސް ކުރެއްވި މުހައްމަދު ނަޝީދު ވޯޓު ލައްވައިފިއެވެ.

ރައީސް ނަޝީދު ވޯޓު ލެއްވީ އަމީނިއްޔާ ސްކޫލަށެވެ.

މާލެ ސިޓީ ކައުންސިލް ގެ މޭޔަރަކު ހޮވުމަށާއި ހުސްވެފައިވާ ގޮނޑި ތަކަށް މެމްބަރުން އިންތިހާބް ކުރުމަށްޓަކައި ކުރިއަށް ދާ ވޯޓުލުން ފެށީ މިއަދުގެ ހެނދުނު 8 ޖެހިއިރުއެވެ.

Advertisement

މާލެ ސިޓީއަށް އިއްޔެ ވެސް މޫސުން ގޯސްވެ ވިއްސާރަ ވެހުމުގެ ސަބަބުންނާއި، ކުރިއަށް ވެސް މޫސުން ގޯސްވެދާނެ ކަމަށް ލަފާކޮށްފައިވާތީ ވޯޓުލުން މިއަދު ހަވީރު 5 ޖަހާއިރު ނިންމާ ގޮތަށް އިލެކްޝަންސް ކޮމިޝަން (އީސީ) އިން ވަނީ ނިންމާފައެވެ.

މި އިންތިހާބުގައި 54680 އަށްވުރެ ގިނަ މީހުންނަށް ވޯޓު ލުމުގެ ހައްގު ލިބޭ ކަމަށް އީސީ އިން ވަނީ ހާމަކޮށްފައެވެ.

މި އިންތިހާބުގައި މާލެ ސިޓީގެ މޭޔަރު ކަމަށް ކުރިމަތި ލައްވާފައިވަނީ :

1. ޝުއައިބު އަލީ (އަމިއްލަ ގޮތުން)

2. ހުސެއިން ވަހީދު (އަމިއްލަ ގޮތުން)

3. އާއިޝަތު އާޒިމާ ޝަކޫރު (ޕީއެންސީ)

4. އާދަމް އާޒިމް (އެމްޑީޕީ)

5. މުހައްމަދު ސައިފް ފާތިހު (ދަ ޑިމޮކްރެޓްސް)

މާލޭ ސިޓީގެ މޭޔަރު ކަމުގެ ގޮނޑި ހުސްވެފައިވަނީ ކުރިން އެ މަޤާމުގައި ހުންނެވި  ރައީސް ޑރ.މުޙަައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާ ކަމަށް ހޮވިވަޑައިގަތުމުންނެވެ.

މޭޔަރަކު ހޮވުމުގެ އިތުރުން މާފަންނު ދެކުނު ދާއިރާ އާއި ހެންވޭރު ދެކުނު ދާއިރާ އާއި މެދުހެންވޭރު ދާއިރާއަށް ކައުންސިލަރުން ހޮވުމަށް ވޯޓުލުން ވެސް މިއަދު ކުރިއަށްދާ ކަން ފާހަގަކޮށްލެވެއެވެ.