މާލޭ މޭޔަރަކު ހޮވުމަށް މިއަދު ބާއްވަމުންދާ އިންތިހާބުގައި ވޯޓްފޮށި ބެހެއްޓިފައިވާ އެއް މަރުކަޒު ކަމަށްވާ ސޯޝަލް ސެންޓަރުގައި ކެންޕެއިންގެ އެއްވެސް ޙަރަކާތެއް ނުހިނގާކަމަށް އިލެކްޝަން ކޮމިޝަނުން ބުނެފިއެވެ.

އިލެކްޝަން ކޮމިޝަނުން މިހެން ބުނެފައިވަނީ މާލޭ މޭޔަރު އަދި ކައުންސިލް ބައި އިލެކްޝަނުގެ އިންތިހާބުގައި ވޯޓުލާން ފަސް ވޯޓު ފޮއްޓެއް ބަހައްޓާފައިވާ ސޯޝަލް ސެންޓަރުގައި ސަރުކާރަށް ނިސްބަތްވާ ކެންޑިޑޭޓު އާޒިމާ ޝުކޫރަށް ކެމްޕެއިން ކޮށްދިނުމަށް ސަރުކާރު އޮފީހެއް ހަދައިގެން މަސައްކަތް ކުރަމުންދާ ކަމުގެ ތުހުމަތު ސޯޝަލް މީޑިއާގައި ކުރަމުން ދާތީވެ "ވޮއިސް" އިން ކުރި ސުވާލަކަށް ޖަވާބު ދެއްވަމުންނެވެ.

މިކަމާއި ގުޅިގެން އީސީގެ ނައިބު ރައީސް އިސްމާއިލް ހަބީބު "ވޮއިސް" އަށް ވިދާޅުވީ، ސޯޝަލް މީޑިޔާގައި އެފަދަ ޚަބަރެއް އުޅޭތީވެ، ބައެއް ފަރާތްތަކުން އެކަމުގެ ޝަކުވާ ލިބިގެން ސީދާ އީސީގެ ފަރާތުން ގޮސް އެކަންތައްތައް ބައްލަވާފައިވާ ކަމަށެވެ.

ހަބީބު ފާހަގަކުރެއްވި ގޮތުގައި ސޯޝަލް ސެންޓަރުގައި އީސީން ބަހައްޓާފައިވާ ވޯޓްފޮށިތައް ބެހެއްޓިފައި ހުރީ އެ ސެންޓަރުގެ ހޯލުގައާއި އަދި ބޭރު ހަރުގޭގައެވެ. ހަބީބު ވިދާޅުވީ މިނިސްޓްރީގެ ޢިމާރާތް ހުރީވެސް އެއިން ތަނަކާއި ކައިރީގައިވެސް ނޫންކަމަށެވެ.

ޙަބީބު އިތުރަށް ވިދާޅުވި ގޮތުގައި އިންތިހާބާއި ގުޅޭ  އެއްވެސް ޝަކުވާއެއް އެއްވެސް ފަރާތަކުން ލިބިއްޖެ ނަމަ އެބޭފުޅުން އެކަމެއް ބަލާ ފިޔަވަޅު އަޅުއްވަމުން ގެންދަވާނެ ކަމަށެވެ.  "އެފަދަ އެއްވެސް ކަމެއް ހިނގާނަމަ އަޅުގަނޑުމެން އެކަމެއް ބަލާ ޤަވާޢިދުން އަޅަން ޖެހޭ ފިޔަވަޅެއް އަޅާނަށް" ވަރަށް ޔަޤީން ކަމާއިއެކު ހަބީބު ވިދާޅުވިއެވެ.