އިންޑިއާ ކަނޑަކީ ވަކި ގައުމެއްގެ މިލްކެއް ނޫން ކަމަށާއި ކުޑަ ގައުމަކަށް ވިޔަސް ބޭރުގެ ބޮޑެތި ގައުމަތަކަށް ނުރަނގަޅު ނުފޫޒު ނުފޯރުވޭނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ޗައިނާއަށް ކުރެއްވި ތާރީޚީ ފުރަމާނަ ދަތުރުފުޅު ނިންމަވައިލެއްވުމަށް ފަހު ވެލާނާ އިންޓަނޭޝަނަލް އެއާޕޯޓުގައި ހުންނަވައި މީޑީއާތަކަށް ދެއްވި ސްޓޭޓްމަންޓެއްގައއެވެ.

ރާއްޖެ އާއި އަވައްޓެރި އިންޑިޔާގެ ބައެއް ފަރާތްތަކުން އަންނަނީ ރާއްޖެއަކީ އިންޑިއާގެ ބެކްޔާޑުގައި އޮތް ގައުމެއް ގޮތުގައި ރާއްޖެ ސިފަކުރަމުންނެވެ. އެކަމަށް އިޝާރާތްކުރައްވާ އެ މަނިކުފާނު ނުސީދާ ގޮތެއްގައި ވިދާޅުވީ، ރާއްޖެއަކީ އެއްވެސް ގައުމެއްގެ ބެކްޔާޑުގައި އޮތް ގައުމެއް ނޫން ކަމަށެވެ.

ރައީސް ވިދާޅުވި ގޮތުގައި ޤައުމު ކިތައްމެ ކުޑަވި ނަމަވެސް އެއްޤައުމަކަށް އިންޑީޔާ ކަނޑުގެ ހިއްސާ އެންމެ ބޮޑުވާނީ ދިވެހިރާއްޖެއަށް ކަމަށެވެ.

ރައީސް ވަނީ މި ބައްދަލުވުމުގައި ޗައިނާއަށް ތަޢުރީފްކޮށް ވާހަކަފުޅު ދައްކަވާފައެވެ. ރައީސް ވިދާޅުވީ، ރާއްޖެ - ޗައިނާ ގުޅުމުގެ މައިގަނޑު އެއް އަސާސަކީ 'ނޯ އިންޓަފިއަރެންސް އިން އިންޓާނަލް މެޓާސް' ކަމަށެވެ. އެގޮތުން، ރާއްޖޭގެ ދާޚިލީ އެއްވެސް ކަމަކަށް ޗައިނާއިން ނުފޫޒު ނުފޯރުވާ ކަމަށް އެ މަނިކުފާނު ވިދާޅުވިއެވެ.