މާލޭގެ މޭޔަރު ކަމަށް އިންތިހާބުވި އާދަމް އާޒިމް މާލޭގެ ރައްޔިތުން މާޔޫސް ނުކުރައްވާނެ ކަމަށް އެމްޑީޕީގެ ރައީސް އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހް މިފަދައިން ވިދާޅުވީ އާޒިމް މޭޔަރު ކަމަށް އިންތިހާބު ވުމާއި ގުޅިގެން އެޕާޓީން އުފާ ފާޅު ކުރުމަށް ބޭއްވި "ޝުކުރިއްޔާ ރައްޔިތުން" ޖަލްސާގައި ވާހަކަފުޅު ދައްކަވަމުންނެވެ.
"އާދަމް އާޒިމެއް މާލޭގެ ރައްޔިތުންނެއް މާޔޫސް އެއް ނުކުރާނެ. މި އެމްޑީޕީއެއް މާލޭގެ ރައްޔިތުނެއް މާޔޫސް އެއް ނުކުރާނެ. "
ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ އާޒިމް މޭޔަރު ކަމަށް އެ އަންނަނީ ތަސައްވުރަކާއި އެކީގައި ކަމަށެވެ. އަދި އާޒިމް އަންނަނީ ސަރުކާރެއް ހަދައިގެން އިތުރު ސަރުކާރެއް މިހާރު އޮތް ރައީސް ޑރ.މުއިއްޒުގެ ސަރުކާރުގެ ތެރޭގައި ހިންގާކަށް ނޫން ކަމަށާއި ގާނޫނީ ގޮތުން މަތިކޮށްފައި އޮތް މަސްއޫލިއްޔަތު ތަކެއް އަދާކުރަން ކަމަށް ވެސް އެމަނިކުފާނުގެ ވާހަކަފުޅުގައި ވިދާޅުވިއެވެ.
އާޒިމް މާލޭގެ މޭޔަރު ކަމާއި ހަވާލުވެ ވަޑައިގަންނަވަނީ މާލޭގެ ރައްޔިތުން އެދޭ ގޮތަށް މާލެ ބަދަލު ކުރުމަށް ކަމަށާއި އެގޮތުން ފުނި ޖެހިފައި އޮތް ދަތި އުނދަގޫ މާލެއަށް ހައްލެއް ހޯދައިދީ، ޓްރެފިކަށް ހައްލު ހޯދައި، "ކުނިވެފައި އޮތް" މާލެ ސާފު ކުރުމަށް އާޒިމާއި އެކީގައި އެމްޑީޕީން ނުކުންނާނެ ކަމުގެ ޔަގީންކަން ވެސް އެމަނިކުފާނު ވަނީ ދެއްވާފައެވެ.
މީގެ އިތުރުންވެސް ރައީސް ޞާލިހު ވިދާޅުވީ މާލޭގެ ރައްޔިތުން މިއަދު މެސެޖެއްދީފި ކަމަށާއި 71 ޕަސެންޓް މި ސަރުކާރުގެ ސިޔާސަތުތަކަށް ނޫނެކޭ ބުނެފި ކަމަށެވެ. އަދި ވެރިކަމަށް އައިތާ ދެމަސް ނުވަނީސް މާލޭ ރައްޔިތުން ނުކުމެ މިސަރުކާރާއި ސަރުކާރުގެ ސިޔާސަތުތަކަށް ނޫނެކޭ ބުނީ ސަބަބެއް ނެތި އެއް ނޫން ކަމަށާއި ސަރުކާރުގެ އަސްލު ކުލަ ދައްކާލައިފިކަމަށް ވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
