Solih Azim ah; mi siyaasee binga elhunee, adhives othee kuriah

ޞާލިހު އާޒިމަށް؛ މި އެޅުނީ ސިޔާސީ ބިންގާ، އަދިވެސް އޮތީ ކުރިއަށް

14 Jan 2024 | 07:19

ކުރީގެ ރައީސް އިބްރާހިމް މުހައްމަދު ޞާލިހު-- ފޮޓޯ: އެމްޑީޕީ

މާލޭ ސިޓީގެ މޭޔަރު ކަމަށް އިންތިހާބު ވުމާއި އެކު އެ އެޅުނީ ސިޔާސީ ބިންގާ ކަމަށާއި އަދިވެސް އޮތީ ކުރިއަށް ކަމަށް ކުރީގެ ރައީސް އަދި އެމްޑީޕީގެ ރައީސް އިބްރާހިމް މުހައްމަދު ޞާލިހު އާދަމް އާޒިމަށް ނިސްބަތްކޮށް ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ އެމްޑީޕީ ގެ ކެނޑިޑޭޓް އާޒިމް އަށް މާލޭ ސިޓީގެ މޭޔަރު ކަން ލިބުމާއި ގުޅިގެން އެ ޕާޓީން އުފާ ފާޅު ކުރުމަށް މިރޭ ކުރިއަށް ގެންދިޔަ "ޝުކުރިއްޔާ ރައްޔިތުން" ޖަލްސާގައި ވާހަކަފުޅު ދައްކަވަމުންނެވެ.

މިގޮތުން ރައީސް ޞާލިހު ވަނީ ތެދުވެރިކަމާއި ވަފާތެރިކަމާއި، އަމާނާތް ތެރިކަމާއި އެކުގައި ރައްޔިތުން ހަވާލުކުރި މަސައްކަތް ކުރިއަށް ގެންދިއުމަށް އާޒިމް އަށް އިލްތިމާސް ކޮށްފައެވެ.

"އާދަމަށް އަޅުގަނޑު ދަންނަވާލަނީ، އާދަމް، އާދަމްގެ ޕޮލޮޓިކަލް ކެރިއާގެ ބިންގާ ތިއެޅުނީ. ތެދުވެރިކަމާއި ވަފާތެރިކަމާއި، އަމާނާތް ތެރި ކަމާއި އެކުގައި ރައްޔިތުން ހަވާލުކުރެއްވި މަސައްކަތް ކުރިއަށް ގެންދަވާ. ކާމިޔާބު އަދި އޮތީ ކުރިއަށް."

ރައީސް ޞާލިހު ވިދާޅުވިއެވެ.

މިއަދު ބޭއްވުނު މާލޭ ސިޓީ ކައުންސިލަށް މޭޔަރަކު ހޮވުމާއި، ކައުންސިލްގެ ގެ ހުސްވެފައިވާ ގޮނޑިތަކަށް މެންބަރުން ހޮވުމަށް ބޭއްވި މި އިންތިހާބުގައި މޭޔަރުކަން އާޒިމް ކާމިޔާބު ކުރައްވާފައި ވަނީ 3،529 ވޯޓާއެކު އެވެ. މިއީ ވޯޓު ލީ މީހުންގެ ނިސްބަތަށް ބަލާއިރު 46 އިންސައްތަ ވޯޓެވެ.

މާލޭ ސިޓީގެ މޭޔަރު ކަމަށް ކުރިމަތި ލެއްވުމުގެ ކުރިން އާޒިމް ވަނީ އެމްޓީސީސީ ގެ މެނޭޖިން ޑިރެކްޓަރ (އެމްޑީ) ކަން ވެސް ކުރައްވާފައެވެ.

ހަބަރު

ރައީސް އިބްރާހިމް މުހައްމަދު ޞާލިހް

އާދަމް އާޒިމް

ކޮމެންޓް

އަލީ

އެހެން މީހުނަށް ނަސޭހަތްތެރިވެވަޑައިގަތުމުގެ ކުރީގައި އަމިއްލަފުޅަށް އިސްލާހުވެވަޑައިގަންނަވާ. أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ ۚ أَفَلَا تَعْقِلُونَ

14 Jan 2024