މާލެ ސިޓީ ކައުންސިލްގެ ހުސްވެފައިވާ މޭޔަރ ކަމުގެ ގޮނޑި އެމްޑީޕީއަށް ކާމިޔާބު ކުރެވުމަކީ ސަރުކާރަށް ދެވުނު މުހިންމު މެސެޖެއް ކަމަށް އެމްޑީޕީގެ ޗެއަރޕާސަން އަދި ކުރީގެ އިކޮނަމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ. 

އިއްޔެގެ މޭޔަރ ބައި އިލެކްޝަން އެމްޑީޕީގެ ކެންޑިޑޭޓް އާދަމް ޢާޒިމް ކާމިޔާބު ކުރެއްވުމާއި ގުޅިގެން ފައްޔާޒު ކުރެއްވި ޓްވީޓެއްގައި ވިދާޅުވީ އެއީ، ހައްސާސް ދަނޑިވަޅެއްގައި މާލޭ ގެ ރައްޔިތުން އަދި ޖުމްލަކޮއް ދިވެހިންނަށް ލިބުނު މުހިންމު ކާމިޔާބެއް ކަމަށެވެ. 

"ހައްސާސް ދަނޑިވަޅެއްގައި މާލޭ ގެ ރައްޔިތުން އަދި ޖުމްލަކޮއް ދިވެހިންނަށް ލިބުނު މުހިންމު ކާމިޔާބެއް. މުހިންމު މެސެޖެއް. މަރުހަބާ ޢާޒިމް އަދި އެމް.ޑީ.ޕީ ގެ ލޮބުވެތި މެންބަރުންނާއި ތާއިދުކުރާ ބޭފުޅުން." ފައްޔާޒު ވިދާޅުވިއެވެ. 

އިއްޔެ މާލޭގައި ބާއްވާފައި ވަނީ، ހުސްވެެފައިވާ މާލޭ މޭޔަރ ކަމާއި، މާލޭ ކައުންސިލަރުންގެ ތިން ގޮނޑިއަަކަށް މެންބަރުން ހޮވުމުގެ އިންތިހާބެވެ. 

އެ އިންތިޚާބުގައި މާލޭ މޭޔަރ ކަމަށް 5 ކެންޑިޑޭޓަކު ވަނީ ވާދަކުރައްވާފައެވެ. އެއީ، ސަރުކާރުގެ ޕާޓީ ޕީއެންސީގެ ފަރާތުން ޢާއިޝަތު ޢާޒިމާ ޝަކޫރު، އެމްޑީޕީގެ ފަރާތުން އެމްޑީޕީގެ ކުރީގެ ސީއީއޯ އާދަމް އާޒިމް، ޑިމޮކްރެޓްސްގެ ފަރާތުން ސައިފް ފާތިހް އަދި އަމިއްލަ ގޮތުން ހުސައިން ވަހީދާއި ޝުޢައިބެވެ. 

އޭގެ ތެރެއިން އެންމެ ގިނަ ވޯޓު ހޯއްދެވި އާޒިމަށް ލިބިވަޑަައިގަތީ 7،621 ވޯޓެވެ. އާޒިމާ އަށް ލިބިވަޑައިގަތީ 5،031 ވޯޓެވެ. އަދި ސައިފަށް 2،343 ވޯޓު ލިބިވަޑައިގެންނެވިއިރު ހުސައިން ވަހީދަށް ލިބިވަޑައިގަތީ 1،888 ވޯޓެވެ. ޝުއައިބަށް ލިބި ވަޑައިގަތީ 125 ވޯޓެވެ.

އެހެންކަމުން، ވޯޓުލީ މީހުންގެ 44 އިންސައްތަ އާއެކު މޭޔަރ އިންތިޚާބު ކާމިޔާބު ކޮށްފައިވަނީ އާޒިމެވެ. 

އިއްޔެގެ މޭޔަރ ބައި އިލެކްޝަން ގައި ވޯޓުލުމުގެ ހައްގު ލިބިގެންވާ 54,680 މީހުންގެ ތެރެއިން ވޯޓުލާފައި ވަނީ 17,410 މީހުންނެވެ.