ރާއްޖެއަށް ގެންނަށް ބޭނުންވާ ތަރައްޤީ ގެނައުމުގައި އެންމެ ބުރަކޮށް މަސައްކަތްކުރާ ސަރުކާރުގެ އެއް ކުންފިނި ކަމަށްވާ އެމްޓީސީސީއަށް ބާރު ބޮޑުވާތީ، އެ ކުންފުނިން ކުރާ މަސައްކަތް ކުރާ އިތުރު ކުންފުންޏެއް އުފައްދަން ވަޒީރުންގެ މަޖިލީހުން މިއަދު ނިންމައިފިއެވެ.
މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގެ ތަފުސީލުތައް ހާމަކުރަން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވިދާޅުވީ، މިހާރު އެމްޓީސީސީގައި 100 އެތައް މަޝްރޫއެއް ފުނިޖެހިފައިވާ ކަމަށެވެ. އަދި، އެ ހުރިހާ މަޝްރޫއެއް ކުރިއަށް ގެންދިއުމުގެ ޤާބިލުކަން އެ ކުންފުނީގައި ނެތް ކަމަށެވެ.
"އެބޭފުޅުންނަށް ކުރެވޭ ވަރަށް ވުރެ މަސައްކަތްތަކުގެ އަދަދު ގިނަވެ، މަސައްކަތްތައް ބޮޑުވެފައިވާތީވެ އެކަންކަމަށް ހައްލެއް ހޯދުމުގެ ގޮތުން ކުރެވުނު މަޝްވަރާއެއް،". މިއަދުގެ ބައްދަލުވުމުގައި ނާޒިމް ވިދާޅުވިއެވެ.
ނާޒިމް މިހެން ވިދާޅުވެފައިވާ އިރު އެމްޓީސީސީއަކީ ރާއްޖޭގައި ސަރުކާރުން ކުރިއަށްގެންދާ އިންފްރާސްޓްރަކްޗަރގެ ގިނަ މަސައްކަތްތަކެއް ކުރިއަށް ގެންދާ މައި ކުންފުންޏެވެ. އޭގެ ތެރޭގައި ރަށްރަށުގެ ބަނދަރުތައް ހެދުމާއި، ފަޅުތައް ހިއްކުން ފަދަ ބިޔަ ބޮޑަތި މަޝްރޫޢުތައް ހިމެނެއެވެ.
ރާއްޖޭގެ ތަރައްޤީގައި އެމްޓީސީސީ ހިމެނެނީ އެންމެ ގިނަ މަސައްކަތްތައް ކުރާ އެންމެ ރަނގަޅު ނަތީޖާ ނެރެދޭ އެއް ކުންފުނީގެ ގޮތުގައެވެ. ނަމަވެސް މި ފަހަކަށް އައިސް އެކުންފުނި ވެފައިވަނީ މަސައްކަތުގެ ގޮތުން ބާރު ބޮޑުވެފައިވާ ކުންފުންޏަކަށެވެ. ނާޒިމް ވިދާޅުވި ގޮތުގައި ސަރުކާރުގެ މިއަދުގެ އެ ނިންމެވުމަކީ މިކަމަށް ހައްލު ލިބިގެން ދާނެކަމެކެވެ.
ވަޒީރުންގެ މަޖިލހުން މިއަދު މިފަދައިން ނިންމާފައިވާ އިރު ސަރުކާރުގެ ކުންފުނިތައް ހަރުދަނާ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ވައުދެއްވެސް މެއެވެ.
Advertisement
This content is created and paid for by advertisers and does not involve Voice Journalists
