ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ޗެރިޓީ ޝީލްޑް މެޗު، ކާމިޔާބު ކުރި ލ. ގަމު ފުޓުސަލް ޓީމަށް ލިބުނު ފައިސާ، ފަލަސްޠީނަށް ހަދިޔާ ކޮށްފިއެވެ. 

މުޅި ރާއްޖެއަށް ހުޅުވާލައިގެން އަތޮޅުތަކުގެ ރަށްތަކަށް ބާއްވާ ރާއްޖޭގެ އެންމެ ބޮޑު، ފުޓްސަލް މުބާރާތް، ގޯލްޑަން ފުޓްސަލް ޗެލެންޖް 2024 ފެށުމުގެ ގޮތުން ރޭ ކުޅުނު ޗެރިޓީ ޝީލްޑް މެޗުގައި ވާދަކުރީ އެންމެފަހުގެ ޗެމްޕިއަން ލ. ގަމާއި އޭގެ ކުރީ އަހަރުގެ ޗެމްޕިއަން، ތ. ތިމަރަފުއްޓެވެ.

ފޯރިގަދަ އެ މެޗު، 3-2 ގެ ނަތީޖާއަކުން ގަމުން މެޗު ކާމިޔާބުކުރީ ފަހު ސިކުންތުކޮޅުގައި ގޯލު ޖަހައިގެންނެވެ.

ޗެރިޓީ ޝީލްޑް މެޗުން، މޮޅުވި ގަމަށް ލިބުނު 25،000 ރުފިޔާ ވަނީ ފަލަސްތީނުގެ ގާޒާ ރައްޔިތުންނަށް ހަދިޔާކޮށްފައިވާއިރު، މި ފައިސާ ފަލަސްތީނާ ހަމައަށް ފޯރުކޮށްދޭން ހަވާލުކޮށްފައިވަނީ، "އިންޓަނޭޝަނަލް އެއިޑް ކެމްޕޭން (އައިއޭސީ)" އާއެވެ.

އެކަމާއި ގުޅިގެން އައިއޭސީން ވަނީ ގޯލްޑަން ފުޓްސަލް ޗެލެންޖް ރާވާ ފަރާތްތަކާއި، ގަން ޓީމަށް ޝުކުރު އަދާ ކޮށްފައެވެ. 

އަދި އެ ފައިސާ ހަދިޔާ ކުރެވިފައިވަނީ ފަލަސްޠީނަށް ވަރަށް ހައްސާސް ދަނޑިވަޅެއްގައި ކަން ފާހަގަކޮށް، ފައިސާގެ ހައްގުވެރިންނަށް ފޯރުކޮށްދޭނެ ކަމުގެ ޔަގީންކަން އައިއޭސީން ވަނީ ދީފައެވެ. 

މިދިޔަ އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާއަށް ދިން ހަމަލާތަކުގައި މިހާތަނަށް 23،968 މީހުން ޝަހީދުވެފައިވާއިރު، 60،582 އަށް ވުރެ ގިނަ މީހުން ވަނީ ޒަހަމްވެފައެވެ.