އެމްޑީޕީގެ ފަރާތުން މާލެ ސިޓީގެ މޭޔަރު ކަމަށް އިންތިހާބު ވެވަޑައިގެން އާދަމް އާޒިމް މޭޔަރު ކަމަށް ހުވާކުރުން ކުރިއަށްއޮތް 3 ދުވަސްތެރޭ ބާއްވަން މަސައްކަތް ކުރަމުން އަންނަ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުނެފިއެވެ.
އެލްޖީއޭގެ ސީއީއޯ ޑރ. މަރިޔަމް ޒުލްފާ މިއަދު ވިދާޅުވީ، އިންތިހާބީ މޭޔަރުގެ މަގާމުގެ ހުވާ ކުރުން ކުރިއަށް އޮތް ތިން ދުވަސް ތެރޭ ބޭއްވޭނެ ކަމަށެވެ. އަދި މިދިޔަ ހޮނިހިރު ދުވަހު ބޭއްވި ބައި-އިލެކްޝަނުގެ ދާއިމީ ނަތީޖާ އިއްޔެ ލިބުމާ އެކު، ހުވާ ކުރުމުގެ ރަސްމިއްޔާތުގެ ތައްޔާރީތައް މިހާރު ފަށާފައިވާ ކަމަށް ވެސް ޒުލްފާ ވިދާޅުވިއެވެ.
އާޒިމް މޭޔަރު ކަމުގެ ހުވާ ކުރައްވާ ރަސްމިއްޔާތަށް ރައީސް ޑރ.މުއިއްޒު ވަޑައިގަތުމަށް ހަމަޖެހިފައިވާ ކަމަށާއި، މި ރަސްމިއްޔާތު ބާއްވަން ނިންމާފައިވަނީ ލޯކަލް ގަވަމަންޓް މިނިސްޓްރީގައި ކަމަށް ވެސް ޒުލްފާ ވިދާޅުވިއެވެ.
މާލޭ ސިޓީގެ މޭޔަރު ކަމުގެ ގޮނޑި ބޮޑު ތަފާތަކުން އިދިކޮޅު އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރައްވާފައިވަނީ 7621 ވޯޓާއި އެކުއެވެ.
އާޒިމް ގެ އިތުރުންވެސް މި އިންތިހާބުގައި ޕީއެންސީގެ ފަރާތުން އައިޝަތު އާޒިމާ ޝަކޫރު، ދަ ޑިމޮކްރެޓްސްގެ ފަރާތުން ސައިފް ފާތިހް އަދި އަމިއްލަ ގޮތުން ހުސެއިން ވަހީދާއި، ޝުއައިބު އަލީ ވަނީ ކުރިމަތިލައްވާފައެވެ.
މާލޭގެ މޭޔަރުގެ ގޮނޑި ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާ ކަމަށް އިންތިހާބު ވެވަޑައިގަތުމުންނެވެ. އަދި ސިޓީ ކައުންސިލްގެ ތިން ގޮނޑި ހުސްވީ އެ މަގާމުތަކުގައި ތިއްބެވި ބޭފުޅުން ސަރުކާރުގެ މަގާމުތަކަށް ވަޑައިގަތުމުންނެވެ.
Advertisement
This content is created and paid for by advertisers and does not involve Voice Journalists
