ފުރަތަމަ ފަހަރަށް ރާއްޖޭގެ ޓްރޭޑް ވަފްދެއް އެމެރިކާއަށް ވަޑައިގަތުމަށް ސަރުކާރަށް ދައުވަތު ލިބިފައިވާކަމަށް އިޤްތިޞާދީ ތަރައްޤީއާއި ވިޔަފާރިއާއިބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

އެބޭފުޅާ ވިދާޅުވީ މިދައުވަތު ލިބިފައިވަނީ އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ޓްރޭޑް ރެޕްރެޒެންޓޭޓިވްއާއެކު ބޭއްވި ބައްދަލުވުމުގައި ކަމަށެވެ. މި ބައްދަލުކުރެއްވުމުގައި މުހިއްމު މަޝްވަރާތަކެއް ކުރެއްވިކަމަށާއ ރައީސް ޑރ.މުއިއްޒުގެ ރިޔާސީ ވައުދެއްކަމަށްވާ އޮންލައިން ޕޭމަންޓް ސިސްޓަމްތައް ރާއްޖެއަށް ތައާރަފްކުރުމާއި ގުޅޭގޮތުންވެސް މަޝްވަރާކުރެއްވިކަމަށް ސައީދު ވިދާޅުވިއެވެ.

މީގެ އިތުރުންވެސް ޕޭޕަލް އެމެރިކާގެ ޕޭޕަލް ރާއްޖެއަށް ގެނައުމަށް މި ބައްދަލުވުމުގައި މަޝްވަރާކޮށް ޕޭޕަލް ގެނައުމާއި ގުޅޭގޮތުން އެމެރިކާ ސަރުކާރުގެ ކަމާއިބެހޭ ފަރާތްތަކާއެކު މަޝްވަރާކުރުމަށް ރާއްޖޭގެ ޓްރޭޑް ވަފްދެއް އެމެރިކާއަށް ވަޑައިގަތުމުގެ ވަނީ ލިބިފައި ކަމަށް ވެސް އެބޭފުޅާ ވިދާޅުވިއެވެ.

މިކަމާއި ގުޅިގެން އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާއިން މި އަހަރުގެ ތެރޭގައި މި ވަފުދު އެމެރިކާއަށް ދާނެ ކަމަށް ބުނި ނަމަވެސް ދާނެ ވަކި ތާރީޚެއް އަދި ހާމައެއް ނުކުރެއެވެ.

ޕޭޕަލްފަދަ އޮންލައިން ޕޭމަންޓް ސިސްޓަމްތައް ރާއްޖެއަށް ތައާރަފްކުރުމަކީ ރައީސް ޑރ.މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ މުހިއްމު ވައުދަކަށް ވާއިރު މި ވައުދު ފުއްދުމުގެ މަސައްކަތުގެ ތެރެއިން މި މަހުގެ 6 ވަނަ ދުވަހު ބޭއްވި ވަޒީރުންގެ މަޖިލީހުގައި އޮންލައިން ޕޭމަންޓް ޕްލެޓްފޯމް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމުގެ މަސައްކަތް ކުރިއަށް ގެންދިއުމަށް ނިންމާފައިވާކަން ފާހަގަކޮށްލެވެއެވެ.