ހއ. ދިއްދޫގައި، ކުރީ ސަރުކާރުން، ފެނަކައަށް ކޮންޓްރެކްޓް އުސޫލުން ނަގާފައިވާ މުވައްޒަފުން ތަކެއްގެ ކޮންޓްރެކްޓްގެ މުއްދަތު ހަމަވުމުން ކޮންޓްރެކްޓް އައު ނުކުރުމުން އެކަމާއި ނުރުހުން ފާޅުކޮށް ކުރި އިހްތިޖާޖު ފަރުޟު ފަތިސް ނަމާދާއިވެސް ގުޅުވާލައިފިއެވެ. 

މިއަދު ހެނދުނުން ފެށިގެން ގިނަ އިރު ތަކެއް ވަންދެން އެ މުވައްޒަފުން ކުރި އިހްތިޖާޖުގައި، އެމީހުން ތިބީ ޝުޢޫރު ފާޅުކޮށް ލިޔެފައިވާ ބޯޑުތައް ހިފައިގެންނެވެ. 

އެގޮތުން ހިފައިގެން ތިބި އެންމެ ބޮޑުގައި ލިޔެފައިވަނީ، "ފަތިސް ނަމާދުން ފައިބާފައި ތިޔަ ކަނޑާލީ، 10 ކިލޯ ކާޑު ދިނަސް މިކަމެއް ނުވާނެ" ކަމަށެވެ. 

މީގެ އިތުރުން ވެސް އެހެން ބޯޑެއްގައިވެސް ރައީސުލްޖުމުހޫރިއްޔާ ޑރ މުހައްމަދު މުޢިއްޒު އާއި ނަމާދާއި ގުޅުވައި ލިޔުން ލިޔެފައިވެއެވެ. 

މުއްދަތު ހަމަވުމުން ކޮންޓްރެކްޓް އައު ނުކުރުމުން އިހްތިޖާޖު ކުރި އެ މުވައްޒަފުން ނަމާދާއި ގުޅުވައި މިފަދައިން އިހްތިޖާޖު ކޮށްފައި މިވަނީ، ރައީސުލްޖުމުހޫރިއްޔާ ޑރ މުޢިއްޒު، ފަރުޟު ފަތިސް ނަމާދު ޖަމާޢަތުގައި ކުރައްވާތީ އާއި، އެމާނިކުފާނު ނަމާދަށް ފަރުވާތެރިވާތީ ގިނަ ބައެއްގެ ލޯބި ލިބިފައިވާތީ ކަމަށް ބެލެވެއެވެ. 

ފެނަކަ މުވައްޒަފުންގެ ކޮންޓްރެކްޓް އައު ނުކުރި މައްސަލާގައި އެ ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ މުވައްޒަފުން ވަކިކުރީ ކޮންޓްރެކްޓު ހަމަވުމުން ކަމަށާއި އެ މުވައްޒަފުންނަކީ ފެނަކަ ކޯޕަރޭޝަންގެ ދިއްދޫ އާ އިންޖީނުގެ އެޅުމަށް ނަގާފައި ތިބި މުވައްޒަފުންތަކެއް ކަމަށެވެ.

މުއާޒް ވިދާޅުވީ އެ މަޝްރޫއުގެ މަސައްކަތަށް 70 މުވައްޒަފުން ނަގާފައިވާއިރު، 23,000,000 އަށްވުރެ ގިނަ ރުފިޔާ އަރާކަމަށެވެ. 

އަދި އެ ޕްރޮޖެކްޓް ގެ މަސައްކަތް މިވަގުތު ހުއްޓިފައިވާ ކަމަށާ، މަސައްކަތް ކުރިއަށް ނުދިޔަ އިރުވެސް އެ މުވައްޒަފުންނަށް މުސާރަ ދެވިފައިވާ ކަން މުއާޒު ފާހަގަކުރެއްވި އެވެ. ނަމަވެސް ޕްރޮޖެކްޓް ނުހިނގާ އިރު، ކޮންޓްރެކްޓް އައުކޮށްގެން މުވައްޒަފުން ބެއިތިއްބުމަށް ކުންފުނީގެ ހާލަތު ތަން ނުދޭ ކަމަށްވެސް ވިދާޅުވި އެވެ. 

މީގެ އިތުރުން ވޮއިސް އަށް މައުލޫމާތު ދެއްވަމުން މުއާޒު ވަނީ ގޮތުގައި ކޮންޓްރެކްޓު ހަމަވެގެން ފެނަކައިން 904 މުވައްޒަފުން ދޫކޮށްލަން ޖެހުނުކަން ފާހަގަކުރައްވާފައެވެ. އަދި އެކަމުގެ ސަބަބުން ވެސް 5.3 މިލިއަން ރުފިޔާ ސަލާމަތް ކުރެވުނުކަމަށްވެސް އޭނާ ވިދާޅުވި އެވެ. 

ފެނަކަ ކުންފުނީގެ ދަރަނި އިންތިހާއަށް އިތުރުވެފައިވާއިރު، މުވައްޒަފުންގެ މުސާރައިގެ ގޮތުގައި އެކަނިވެސް 79 މިލިއަން ރުފިޔާ ހޭދަކުރަން ޖެހޭކަމަށް އެ ކުންފުނިން މީގެ ކުރިން ވަނީ ހާމަކޮށްފަ އެވެ. 

މުއާޒު ކުންފުންޏާއި ހަވާލުވުމަށްފަހު، ވަނީ ކޮންޓްރެކްޓް ހަމަވެފައިވާ މުވައްޒަފުންގެ ކޮންޓްރެކްޓް އާކުރުމުގެ އުސޫލަށް ބަދަލުގެނެސްފަ އެވެ. އެގޮތުން މަސައްކަތެއް ނެތް ކޮންޓްރެކްޓު މުވައްޒަފުންގެ މުސާރަ އާކޮށްނުދިނުމަށް މުއާޒު ވަނީ ނިންމަވާފަ އެވެ. 

އޭގެ އިތުރުން ވެސް ކުންފުނީގެ ހިންގުން ހަރަދަނާކޮށް، ކުންފުނި އަރަނިވެރި ކުރުމަށް ކުރެވެން އޮތް މަސައްކަތްތައް ކުރައްވާނެކަމަށް މުއާޒު ވަނީ ވިދާޅުވެފަ އެވެ.