ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލުގެ ދަށުން އިސްލާމިކް މިނިސްޓްރީން ނަގަންޖެހޭ ހުއްދަ ނެތި ޢުމްރާއަށް މީހުން ގެންދިޔުމަށް ފައިސާ ނަގަމުން އަންނަ ދެ ކުންފުންޏަކާއި މެދު ސަމާލުވުމަށް އެ މިނިސްޓްރީން އިލްތިމާސް ކޮށްފިއެވެ.
އިސްލާމިކް މިނިސްޓްރީން ނެރުނު ނޫސް ބަޔާނެެއްގައި ބުނީ ދިވެހި ރާއްޖެއިން އުމްރާއަށް މީހުން ގެންދިއުމުގެ އުސޫލާއި އެއްގޮތަށް ކުންފުނިތަކުން އަމަލުކުރޭތޯ ބެލުމަކީ އެ މިނިސްޓްރީގެ ޒިންމާއެއް ކަމަށާއި މި އުސޫލު ތަކާއި ޚިލާފަށް ބައެއް ކުންފުނި ތަކުން މީހުން އުމްރާއަށް ގެންދާކަން ފާހަގަކުރެވިފައިވާ ކަމަށެވެ.
މި ގޮތުން އުސޫލުތަކާއި ޚިލާފަށް މީހުން އުމްރާ އަށް ގެންދާކަމަށް މިނިސްޓްރީ އަށް ފާހަގަކުރެވިފައިވާ ދެކުންފުންޏަކީ އަލް މަޝްޢަރު ޙައްޖު ޢުމްރާ އާއި ވަޑި ޙައްޖު އެންޑް ޢުމްރާ ކަމަށް އެމިނިސްޓްރީގެ ބަޔާނުގައި ވަނީ ހާމަކޮށްފައެވެ.
މީހުން ޢުމްރާއަށް ދިއުމަށް މިނިސްޓްރީން ހުއްދަ ދޭނީ ޖެހި ޖެހިގެން ދެ އަހަރުގެ މުއްދަތަކަށެވެ. މި ހުއްދަ ނެތި ނުވަތަ އުމްރާ އަށް މީހުން ގެންދިއުމަށް މިނިސްޓްރީން ދީފައިވާ މުއްދަތުގެ ތެރެއަށް ނުވަންނަ ދަތުރުތަކަށް އެޑްވާންސް ކޮށް ފައިސާ ނެގުމަކީ ވެސް މަނާ ކަމެކެވެ.
އެހެންކަމުން ހުއްދަ ނެތި އުމްރާ އަށް މީހުން ނުގެންދިޔުމަށް މިނިސްޓްރީން ވަނީ ކުންފުނި ތަކަށް އިލްތިމާސް ކޮށްފައެވެ. އަދި މިފަދަ ކުންފުނި ތަކަށް ފައިސާ ދެއްކުމަކީ އުސޫލާއި ޚިލާފު ކަމެއް ކަމަށާއި، މި އުސޫލާއި ޚިލާފަށް އަމަލުކޮށްގެން ލިބޭ ގެއްލުމަކަށް ޒިންމާ ވާން ޖެހޭނީ އެ ފަރުދަކު ކަމަށް ވެސް މިނިސްޓްރީން ބުނެއެވެ.
އިސްލާމިކް މިނިސްޓްރީގެ ވެބްސައިޓްގައި ހައްޖާއި އުމުރާއަށް މީހުން ގެންދިއުމަށް ހުއްދަ ދީފައިވާ މީހުންގެ ލިސްޓް ޝާއިުކުރެވިފައިވާނެ ކަމަށާއި އެންމެހާ ފަރާތްތަކުން މިކަމަށް ސަމާލުކަން ދިނުމަށް އިސްލާމިކް މިނިސްޓްރީން ވަނީ އިލްތިމާސް ކޮށްފައެވެ.
Advertisement
This content is created and paid for by advertisers and does not involve Voice Journalists
