ރާއްޖެ އަކީ ހެޕަޓައިޓަސް ބީ ކޮންޓްރޯލް ކުރެވިފައިވާ ގައުމެއް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅައިފިއެވެ.
މިކަން ހާމަކޮށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކްސް ގައި ކުރި ޕޯސްޓެއްގައި ބުނީ ކުޑަކުދިންނަށް ހެޕަޓަޓިސް ބީ ވެކްސިން ދިނުން އަހަރުތަކަކަށް ކުރިއަށް ގެންގޮސް، ވެކްސިން ދިނުން އިތުރުވެފައިވާތީ ކަމަށެވެ.
މީގެ އިތުރުންވެސް ސްކޫލް ކުދިންގެ މެދުގައި ކުރެވުނު ސާވޭގައި އުމުރުން 6 އަހަރާއި 7 އަހަރާ ދެމެދުގެ ސްކޫލް ކުދިންގެ ގައިން އެ ބަލީގެ އެއްވެސް ނިޝާނެއް ފެނިފައިނުވާ ކަމަށް އެޗްޕީއޭއިން ވަނީ ފާހަގަކޮށްފައެވެ.
މީގެ އިތުރުންވެސް ޑަބްލިއުއެޗްއޯ މިފަދައިން ކަނޑައަޅާފައިވަނީ ހެޕަޓައިޓިސް ބީ އަށް މާބަނޑު މީހުން ގަވާއިދުން ސްކްރީން ކުރުމާއި، ޕޮޒިޓިވް މާބަނޑު މީހުންނަށް ފަރުވާ ދިނުމާއި، ޕޮޒިޓިވް މައިންނަށް އުފަންވާ ތުއްތު ކުދިންގެ ރައްކާތެރިކަމަށް އަޅަމުންދާ ފިޔަވަޅުތަކުގެ ސަބަބުން ކަމަށް ވެސް އެޗްޕީއޭއިން މައުލޫމާތު ދެއެވެ.
އެޗްޕީއޭއިން ވަނީ މި ބަލި ރާއްޖެއިން ނައްތާލުމުގައި ރެޔާއި ދުވާލު މަސައްކަތް ކުރި ހުރިހާ ފަރާތްތަކަށް ޝުކުރު އަދާކޮށްފައެވެ.
ހެޕަޓައިޓިސް ބީ އަކީ ހެޕަޓައިޓިސް ބީ ވައިރަސް (އެޗްބީވީ) ގެ ސަބަބުން ފުރަމޭ (ލިވާ) އަަށް ޖެހޭ އިންފެކްޝަނެކެވެ. ހެޕަޓައިޓިސް ބީ ފެތުރެނީ މި ބަލި ޖެހިފައިވާ މީހެއްގެ ލޭ، ކުޅު ނުވަތަ ހަށިގަނޑުގައި ހުންނަ އެނޫންވެސް ފެންތައް ބަލިޖެހިފައި ނުވާ މީހެއްގެ ހަށިގަނޑަށް ވާސިލް ވެގެންނެވެ.
Advertisement
This content is created and paid for by advertisers and does not involve Voice Journalists
