ހައްދުންމަތީ ހިތަދޫ ގެއަކުން އާސާރީ ހިރިގަލު ފޮށްޓެއް ފެނިއްޖެއެވެ. 

މޯލްޑިވްސް ހެރިޓޭޖް ސޮސައިޓީއިން މީސްމީޑިއާގައި ކޮށްފައިވާ ޕޯސްޓެއްގައި ބުނެފައިވަނީ މި ފޮށި ފެނިފައި ވަނީ އިއްޔެ، އެރަށު ގެއެއްގެ ގޯތިތެރެ ކޮންނަނިކޮށް ކަމަށެވެ. 

އަދި މި ފޮށި މިހާރު ހުރީ ހިތަދޫ ކައުންސިލްގެ ބެލުމުގެ ދަށުގައި ކަމަށެވެ. 

މި ފޮށްޓާބެހޭ އިތުރު މައުލޫމާތު “ވޮއިސް“ އާ ހިއްސާކުރައްވަމުން ހިތަދޫ ކައުންސިލްގެ ރައީސް އިބްރާހިމް ޝަމްއޫން ވިދާޅުވީ، އަކަ އެއްގެ ބައްޓަމަށް ހުރި އެ ފޮށީގެ ދިގު މިނުގައި ގާތްގަނޑަކަށް 34.5 ސެންޓިމީޓަރު އަދި އުސްމިނުގައި 19.5 ސެންޓިމީޓަރު ހުރި ކަމަށެވެ. 

އަދި އެ ފޮށީގެ މަތިގަނޑުން ތަންކޮޅެއް ނެއްޓި ފޮށްޓަށްވެސް ބައެއް ގެއްލުން ވެފައިވާ ކަމަށާ، އެފަދައިން ކަންވެފައިވަނީ ކޮނުމުގެ ތެރޭގައި އެއީ ގައު ގަނޑެއް ކަމަށް ދެކި، މާބޮޑު ސަމާލުކަމެއް ނުދީ ކޮނެ ވުމުގެ ސަބަބުން ކަމަށް އޭނާ ވިދާޅުވި އެވެ. 

މީގެ އިތުރުން ޝަމްއޫން ވިދާޅުވީ، ކައުންސިލުން ގަސްތުކުރަނީ، އެ ފޮށި އެރަށަށް ޒިޔާރަތް ކުރާ ފަތުރުވެރިންނަށް ދެއްކުމަށާ، އެފަދަ ބޭނުން ތަކަށް ރަށުގައި ބެހެއްޓުމަށް ގަސްތުކުރައްވާ ކަމަށެވެ. 

މީގެކުރިން ތ.އަތޮޅުން މި ޒާތުގެ ފޮށްޓަކާއި ދ.އަތޮޅު ހުޅުދެލިން ވެސް މީގެ ފޮށްޓެއް ފެނުނެވެ.